प्रचण्ड–बाबुरामविरुद्धको मुद्दा ‘हेर्न नभ्याइने’मा

२५ जेठ, काठमाडौं । प्रधानमन्त्री समेत रहेका नेकपा (माओवादी केन्द्र)का अध्यक्ष समेत रहेका पुष्पकमल दाहाल ‘प्रचण्ड’ र नेपाल समाजवादी पार्टीका अध्यक्ष डा. बाबुराम भट्टराईविरुद्ध दायर मुद्दामा सुनुवाइ गर्न आज पेसी तोकिए पनि सुनुवाइ हुन सकेन । न्यायाधीश प्रकाशमान सिंह राउतको एकल इजलासमा परेको पेसी सर्वोच्च प्रशासनले ‘हेर्न नभ्याइने’मा राखेको छ । 

प्रचण्ड र भट्टराई दस वर्षे तत्कालीन सशस्त्र द्वन्द्व (जनयुद्ध)का नेतृत्वकर्ता हुन् । द्वन्द्वका बेला आफूहरुलाई सानै उमेरमा लडाईमा हिँडाएर ग्रिनेड, बम, युद्ध सामाग्री बोक्ने जस्ता उच्च जोखिमपूर्ण काम लगाएर युद्ध अपराध गरेको भन्दै युद्ध अपराध कसुरमा कारवाही चलाउन अन्तिरिम आदेशको मागदाबीसहित यही जेठ १९ गते मुद्दा दायर भएको थियो । 

मुद्दा पूर्वबाल लडाकु काभ्रेका लेनिन विष्टलगायतले दर्ता गराएका थिए । २०५२ फागुन १ बाट सुरु भएको द्वन्द्व २०६३ मंसिर ५ मा तत्कालीन सरकार र विद्रोही माओवादीबीच बृहत शान्ति सम्झौता भएपछि यूएनको मिसन टोलीले माओवादीका थुप्रै ‘जनसेना’ सेना बन्न योग्यता नपुगेको ठहर गरेको थियो । त्यसपछि उनीहरु (बाल सैन्य)लाई ‘अयोग्य’ देखाई क्याम्पमा नराखी बाहिर पठाइएको थियो । त्यसपछि उनीहरु आफूहरुमाथि लागेको ‘अयोग्य’ बिल्ला हटाउनुपर्ने र क्षतिपूर्तिसहित न्याय दिनुपर्ने लगायत माग राखेर संघर्षरत छन् ।