जसपाले बाेलायो कार्यकारिणी समिति बैठक

२५ जेठ, काठमाडौं । सरकार साझेदार दल जनता समाजवादी पार्टी (जसपा)ले केन्द्रीय कार्यर्काकारिणी समिति बैठक बोलाएको छ । जेठ २७ गते दिउँसो १ बजेका लागि बैठक बोलाइएको हो । सरकारले ल्याएको आर्थिक वर्ष २०८०/८१ को बजेटप्रति जसपाले असन्तुष्ट जनाउँदै आइरहेको छ । 

बुधबार प्रतिनिधिसभाको बैठकमा बजेटमाथिको छलफलमा भाग लिँदै जसपा संसदीय दलका नेता उपेन्द्र यादवले सरकारले बजेटमा मधेशका जनतालाई न्याय दिन नसकेको टिप्पणी गरेका तिए । बजेटको समग्र रुप विभेदकारी रहेको उनको आरोप थियो । 

बजेट पारित हुन बाँकी रहेको बेला जसपाले कार्यकारिणी समिति बैठकलाई अर्थपूर्ण रुपमा लिइएको छ । बैठकमा बजेट, विधान अधिवेशन तथा समसामयिक राजनीतिक विषयमा छलफल हुने जनाइएको छ । साथै कोशी प्रदेशमा नयाँ सरकार गठनबारे पार्टीको पहलकदमीबारे पनि छलफल हुने बताइएको छ