जिल्ला अदालतमा आज टोपबहादुर रायमाझी र उनका छोराको थुनछेक बहस हुने

२६ जेठ, काठमाडौं । नक्कली भुटानी शरणार्थी प्रकरणमा काठमाडौं जिल्ला अदालतमा भइरहेको थुनछेक बहसमा आज पूर्व उपप्रधानमन्त्री एवं सांसद टोपबहादुर रायमाझी र उनका छोराको तर्फबाट बहस हुने भएको छ । 

अभियोग पत्रको क्रमअनुसार सुरु भएको बहसमा अब  टोपबहादुर  र उनका  छोरा सन्दीप रायमाझी रहेको पालो छ । पूर्व उपप्रधानमन्त्री रायमाझी र उनका छोराको प्रतिरक्षामा पूर्वमहान्यायाधिवक्ता एवं वरिष्ठ अधिवक्ता रमेश बडालसहितको टोलीले बहस गर्नेछ ।
 
टोपबहादुरले सहअभियुक्त सानु भण्डारीबाट नेपाली नागरिकलाई भुटानी शरर्णार्थीहरु बनाई अमेरिका पठाउन १ करोड ६० लाख लिएको अभियोग पत्रमा दाबी छ । त्यस्तै भण्डारीबाटै उनका छोरा सन्दीपले ४० लाख लिइएको दाबी गरिएको छ ।

आइतबारबाट सुरु भएको थुनछेक बहसमा मंगलबारसम्म आठ सरकारी वकिलले बहस गरेका थिए । उनीहरूले प्रत्येक प्रतिवादीलाई पुर्पक्षका लागि थुनामा राख्नु पर्ने माग गर्दै बहस गरेका छन् । उनीहरूको बहस सकिएसँगै बुधबारबाट अभियुक्तहरूको बहस सुरु भएको हो । 
 
अभियुक्तहरूको तर्फबाट आज थुनछेक बहसको तेस्रो दिन हो । हालसम्म ६ अभियुक्तको तर्फबाट बहस सकिएको छ । अभियुक्तहरू केशव दुलाल, सानु भण्डारी, सागर राई, सन्देश शर्मा, टंक गुरुङ र ईन्द्रजीत राईको बहस सकिएको हो ।