प्रतिनिधिसभाको आजको बैठक जारी

२६ जेठ, काठमाडौं । प्रतिनिधिसभाको आजको बैठक सुरु भएको छ । सभामुख देवराज घिमिरेले शुक्रबारको बैठकको कामकारवाही प्रारम्भ भएको घोषणा गरेसँगै बैठक ११ः३४ मा सुरु भएको छ । बैठक ११ बजेका लागि बोलाइए पनि आधा घण्टा ढिला सुरु भएको हो ।

बैठकमा सरकारले आगामी आर्थिक वर्ष २०८०/८१ को बजेटमाथि सांसदहरुले धारणा राख्ने कार्यसूची रहेको छ । बैठक सुरु हुनेबित्तिकै प्रमुख प्रतिपक्षी एमालेका सांसद योगेश भट्टराईले कोशी प्रदेशमा पहिचानवादीहरुले एमालेका नेता तथा कोशी प्रदेशका उपसभामुख सिर्जना दनुवार, स्थानीय तहका जनप्रतिनिधिहरुमाथि भइरहेको आक्रमणको विरोध गर्दै आक्रमणमा संलग्नहरुलाई पक्राउ गर्न र कारवाही गर्न सरकारको ध्यानाकर्षण गराएका छन् ।