प्रतिनिधिसभाको बैठकमा एमालेको आक्रोशः कोशीमा पार्टीका नेताहरुमाथि कसको इसारामा आक्रमण भइरहेका छन् ?

२६ जेठ, काठमाडौं । प्रमुख प्रतिपक्षी एमालले कोशी प्रदेशमा आफ्ना पार्टीका नेता र जनप्रतिनिधिहरुमाथि आक्रमणका घटनाप्रति आक्रोश पोखेको छ ।

शुक्रबार प्रतिनिधिसभाको बैठक सुरु हुनेवित्तकै एमालेका सचिवसमेत रहेका सासद योगेश भट्टराईले बिहीबार कोशी प्रदेशका इलाम र उद्यपुरमा पार्टीका नेता तथा स्थानीय जनप्रतिनिधिहरुमाथि कोशी प्रदेशको नामप्रति असन्तुष्ट पक्षधरहरुले कालोमोसो दल्ने र गाडीमाथि ढुंगामुढा गरेर ज्यान लिने प्रयासका घटना भएको उल्लेख गर्दै सभामुख देवराज घिमिरेमार्फत सरकारको ध्यानाकर्षण गराएका छन् । 

सांसद भट्टराई गाडीमा डिजेल, मोबिल छर्केर एमालेका नेताहरुको हत्या प्रयास भएको भन्दै कोशीमा हिंसा भड्काउनेहरुलाई संरक्षण दिनेहरुको पहिचान गरी कारवाहीको दायरामा ल्याउन र घटनाबारे गृहमन्त्रीको जवाफ माग गरे । उनले कोशी प्रदेश नाम संविधानबमोजिम दुईतिहाई बहुमतले पारित गरेर राखेको र फरक मत राखेर नामको विरोधमा उत्रिएका पक्षले संविधानबमोजिम प्रक्रियाबाट आउन चुनौति दिए । उनले कोशीमा प्रदेशको नामाकरणको नाममा हिंसा भडकाउन खोजिरहेको बताए । 

‘कोशी प्रदेशका हिंसा कसले भडकाउन खोजिरहेका छन् ? एमालेका नेतामाथि डिजेल छर्केर हत्याको प्रयास गर्ने तहसम्मको घटनामा को को संलग्न छन् ?’ उनले प्रश्न गरे, ‘एमालेका नेताहरुलाई पक्राउ गर्ने र कारवाही नचलाउने हो भने गृहमन्त्रीले जवाफ दिनुपर्छ, एमालेले आफ्ना नेता कार्यकर्ताको सुरक्षा आफैंले गर्छ ।