इलाम र उदयपुर घटनामा गृहमन्त्रीद्वारा दुःख व्यक्त

२७ जेठ, काठमाडौं । गृहमन्त्री नारायणकाजी श्रेष्ठले बिहीबार कोशी प्रदेशका इलाम र उदयपुरमा प्रमुख पतिपक्षी दल नेकपा (एमाले)का नेता र स्थानीय जनप्रतिनिधिहरुमाथि भएको आक्रमणका घटनाप्रति दुःख व्यक्त गरेका छन् । 

शुक्रबार प्रतिनिधिसभाको बैठकमा सरकारको तर्फबाट जवाफ दिँदै मन्त्री श्रेष्ठले कोशी प्रदेशभित्र विभिन्न जिल्लामा भएका एमालेका नेता तथा जनप्रतिनिधिहरुमाथिको आक्रमण दुःखद् भएको र घटनामा संलग्नलाई खोजी गरी कारवाहीको दायरामा ल्याउन सुरक्षा निकायलाई निर्देशन दिइसकेको जानकारी गराएका छन् । 

बैठकको सुरुमै एमालेका सचिव एवं सांसद योगेश भट्टराईले पार्टीका नेताहरुमाथि भइरहेका घटनाबारे सरकारको जवाफ माग गर्दै बैठक अवरुद्ध पार्ने चेतावनी दिएका थिए । त्यसपछि जवाफ दिने क्रममा मन्त्री श्रेष्ठले घटनामा परेका नेताहरुसँग आफैंले कुराकानी गरेको र उनीहरुले सुरक्षा निकायका कारण आफूहरुलाई कुनै गम्भीर क्षति पुग्न नपाएको भन्दै सुरक्षाकर्मीको प्रसंसा गरेको बताए । 

साथै उनले कोशी प्रदेशका नेता तथा जनप्रतिनिधिहरुको सुरक्षामा विशेष ध्यान दिन निर्देशन दिइसकेको बताए । उनले आन्दोलनको नाममा हिंसात्मक र अराजक गतिविधि बन्द गरेर शान्तिपूर्ण बाटोमा आफ्नो माग राखेर जनतामो मन जित्न आग्रह गरे । अशान्त मच्चाउने र जनधनको सुरक्षामा खतरा पैदा हुने किसिमका गतिविधि बन्द गर्न आग्रह गरे ।

बिहीबार एमालेका केन्द्रीय सदस्य समेत रहेका कोशी प्रदेशसभा सदस्य राम रानामगरलाई इलाममा कार्यक्रममा पुगेका बेला पहिचानवादी आन्दोलनका कार्यकर्ताहरुले सडकमा ढुंगा थुपारेर गाडी रोकी मोविल छर्केर आक्रमण गरेको र कोशी प्रदेशका उपसभामुख सिर्जना दनुवार, उदयपुरको त्रियुगा नगरपालिकाकी उपप्रमुख महेश्वरी राई सवार गाडीमाथि ढुंगामुढा गरेर क्षति पुर्याएका थिए ।

सोही घटनालाई लिएर एमालेका सांसद भट्टराईले आजको बैठकमा सरकारकै संरक्षणमा आन्दोलनकारीहरुले छानीछानी एमालेका नेताहरुमाथि आक्रमण गरिरहेको आरोप लगाएका थिए । उनले सरकारले सुरक्षा नदिने हो भने एमाले प्रतिवादमा उत्रने चेतावनी दिएका थिए । 

गएको फागुन १७ गते प्रदेशसभाको बहुमत (९५) ले प्रदेशको नाम कोशी नामाकरण गरेपछि नामप्रति असन्तुष्ट जनाउँदै पहिचानको आधारमा नाम राख्नुपर्ने भन्दै आन्दोलन जारी राखेका छन् । आन्दोलनका क्रममा आन्दोलनकारी पदमबहादुर लिम्बूको ज्यान गएको छ । उनलाई सरकारले शहीद घोषणा गसिकेको छ । कोशी नाम खारेज गरी पहिचानको आधारमा नामाकरण नगरिएसम्म आन्दोलन नरोकिने उनीहरुको अडान छ ।

यो पनि पढ्नुहोस