कञ्चनपुरमा उखुबारीभित्र महिलाको शव फेला

२६ जेठ, काठमाडौं । कञ्चनपुरमा एक महिला मृत अवस्थामा फेला परेको छ । जिल्लाको बेलडाँडी गाउँपालिका–४ झिलमिला गड्डा टोलकी ४५ की दुर्गा थापाको शव फेला परेको प्रहरीले जनाएको छ । 

बिहीबार दिउँसो घाँस काट्न भनेर घरबाट निस्किएकी उनी घर नफर्किएपछि खोजीका क्रममा मृत फेला परेकी हुन् । 

राति अबेरसम्म घर नफर्किएपछि घर परिवारको खबरका आधारमा खोजतलास गर्दा उखुबारीमा शव फेला परेको जिल्ला प्रहरी कार्यालय कञ्चनपुरका प्रवक्ता, डीएसपी प्रकाश डाँगीले बताए । घटनाबारे थप अनुसन्धान भइरहेको उनले बताए ।