नेप्सेमा सिटी होटलको शेयर कारोबार सुरु

२८  जेठ, काठमाडौं । नेपाल स्टक एक्सचेन्ज (नेप्से) मा सिटी होटल लिमिटेडको शेयर कारोबार सुरु भएको छ । आइतबार स्पेशल प्रि ओपनिङ सेसनमा प्रतिकित्ता १११.१० रुपैयाँ दरले यसको पहिलो कारोबार भएको हो ।

अब सोही भाउलाई आधार मानेर सिटी होटलको नियमित शेयर कारोबार हुनेछ । यस कम्पनीको कुल १ करोड ६७ लाख ४० हजार कित्ता शेयर बिहीबार सूचीकृत भएको हो । नेप्सेले यसको ओपनिङ रेन्ज प्रतिकित्ता ८७ रुपैयाँ ८३ पैसादेखि २६२ रुपैयाँ ४९ पैसासम्म तोकेको थियो । 

सोही रेन्जको न्यूनतम विन्दु नजिकबाट शेयर कारोबार खुला भएको हो ।  ‘सीआइटीवाइ’ संकेतमा यस कम्पनीको शेयर कारोबार सुरु भएको छ ।