लाखौं रुपैयाँ बराबरको सामान वेवारिसे अवस्थामाः गुलरिया नगरपालिकाको चरम लापरवाही

•दीपक शर्मा 

२८ जेठ, बर्दिया । बर्दियाको गुलरिया नगरपालिकाले अपरिपक्व काम गर्दा लाखौं रुपैयाँको सामान अलपत्र परेको छ ।  गुलरिया नगरपालिकाले जिम अर्थात शारीरिक व्यायामका लागि २० लाख रुपैयाँ भन्दा बढीको खर्चमा जिमको लागि आवश्यक पर्ने सामान खरिद गरेको थियो । ती सामान अहिले कार्यालयको पुरानो भवनमा यत्र तत्र छरिएको अवस्थामा रहेको छ । 

पालीका स्रोतका अनुसार कुनै व्यक्तिको जिम खानालाई खुशी पार्नका लागि ल्याइएको उक्त सामान हस्तान्तरणमा प्रकृया नपुगेका कारण महिनौं देखि सामान बेवारिस अवस्थामा रहेको हो । पालिकाले रड, डम्मल, प्लेट, टेस्ट मेसिन, मल्टिपल मेसिन , साइकिलिङ्ग मेसिन लगायतका सामान खरिद गरी ल्याएको थियो ।

गुलरिया नगरपालिकाका सूचना अधिकारी मुकुन्द अर्यालले सो विषयमा आफूलाई थाहा नभएको बताए । यस विषयमा बुझ्दा प्रमुख प्रशासकीय अधिकृत ओमकार शाहले आफू कार्यालयमा हाजिर हुन आउनु भन्दा पहिले नै खरिद गरेको जानकारी दिए । कसलाई दिने हो ? किन खरिद गरिएको हाे ? सो विषयमा थाहा नभएको बताए।

पालीका स्रोतका अनुसार एक जना व्यक्तिको फर्मलाई खुशी पार्नको लागी प्रकृया नपुर्याएरै दिन थालिएको जिमको सामग्री पालिकाको पुरानो भवनमा अहिले वेवारिसे अवस्थामा राखिएको छ । पालिकाले यसरी खरिद गरेको सामानको संरक्षण नगरेकोमा नागरिकहरूले आपत्ति जनाएका छन भने यदि आफ्नो अनुकुलको व्यक्तिका लागि सो सामग्री खरिद गरिएकाे हो भने त्यो पालिकामाथिको लुट भएको बताएका छन ।