बैंकको निक्षेप ३ खर्ब ७० अर्बले बढ्यो, कर्जा लगानी घट्नुमा ‘आर्थिक मन्दी’काे प्रभाव

२८ जेठ, काठमाडौं । पछिल्लो समय बैंक तथा वित्तीय संस्थामा लगानीयोग्य पुँजी अर्थात तरलता जाम हुन थालेको छ । केही महिना अघिसम्म तरलता अभाव देखाउँदै बैंकहरुले कर्जा रोकेका थिए । त्यसपछि बढेको निक्षेप अहिले थुप्रिन थालेको हो । 

नेपाल राष्ट्र बैंकले जनाएअनुसार चालु आर्थिक वर्षको वैशाख मसान्तसम्म ३ खर्ब ७० अर्ब ७८ करोड रुपैयाँले निक्षेप बढेको छ । अघिल्लो आर्थिक वर्षको सोही अवधिमा यस्तो निक्षेप २ खर्ब ३१ अर्ब ३२ करोड थियो । समीक्षा अवधिमा बैंक तथा वित्तीय संस्थाहरूमा रहेको निक्षेप ७.३ प्रतिशतले बढेको हो । हाल बैंक तथा वित्तीय संस्थामा ३ खर्ब बढी तरलता रहेको छ । 

नेपाल राष्ट्र बैंकका अनुसार २०८० वैशाख मसान्तसम्म ५४ खर्ब ९३ अर्ब ४७ करोड रुपैयाँ बराबरको निक्षेप जम्मा हुँदा ४८ खर्ब ५० अर्ब ६० करोड रुपैयाँ मात्र कर्जा लगानी भएको छ ।

तरलता उकालो लागेको अवस्थामा कर्जा प्रवाह भने सुस्ताएको छ । आर्थिक मन्दीको हल्लाका कारण कर्जा लिने पक्ष न्युन देखिएको ठानिएको छ ।