बजेट नसच्याए सरकार ढल्ने माधव नेपालको भविष्यवाणी

२८ जेठ, काठमाडौं । सत्तारुढ दल नेकपा (एकीकृत समाजवादी) का अध्यक्ष माधवकुमार नेपालले वर्तमान सत्ता गठबन्धनले ल्याएको बजेट नसच्याए प्रचण्ड नेतृत्वको सरकार ढल्ने भविष्यवाणी गरेका छन् । 

सरकारले ल्याएको आर्थिक वर्ष २०८०/८१ को बजेटप्रति तीव्र असन्तुष्ट जनाउँदै आएका एकीकृत समाजवादीका अध्यक्ष नेपालले मुख खोलेका छन् । 

आइतबार प्रतिनिधि सभाको बैठकपछि सञ्चारकर्मीहरुसँग कुरा गर्दै उनले सत्ता गठबन्धन ५ वर्ष चलाउनुपर्ने पक्षमा आफू रहेको तर सरकारका गतिविधिले यस्तो नदेखिएको उनको भनाइ थियो । 

उनले अहिलेका बजेटलाई जस्ताको तस्तै पारित नहुने र पारित गर्ने प्रयत्न गरिए सरकार ढल्नबाट कसैले रोक्न नसक्ने बताए । ‘बजेट बेठीक आएको छ । सरकार निरन्तर चलोस् भन्ने मेरो पनि प्रयास छ, सबैले लचकता देखाउँ’ उनले  भने ।