वित्तीय क्षेत्र र शेयरबारे जानकारी लिन गभर्नर र धितोपत्र बोर्डका अध्यक्षलाई बोलाउने अर्थ समितिको निर्णय

२९ जेठ, काठमाडौं । अर्थ समितिले वित्तीय क्षेत्रका समस्याबरे छलफल नेपाल राष्ट्र बैंकका गभर्नर महाप्रसाद अधिकारीलाई बैठकमा बोलाउने निर्णय गरेको छ । बैंक तथा वित्तीय क्षेत्रको तरलता अवस्था, निक्षेप र कर्जा लगानी लगायतका विषयमा गभर्नरसँग जानकारी लिन बैठकमा बोलाइएको समितिले जनएको छ । 

यस्तै नेपाल धितोपत्र बोर्डका अध्यक्ष रमेशकुमार हमाललाई अर्थ समितिको बैठकमा बोलाउने निर्णय गरिएको छ । सोमबार सिंहदरबारमा बसेको समितिको बैठकबाट उनीहरूलाई छलफलका लागि बोलाउने निर्णय गरिएको हो । बैंक र धितोपत्र बोर्डका विषयमा प्रश्न उठाइएकाले त्यसलाई सम्बोधन गर्न गभर्नर र अध्यक्षलाई बोलाउने निर्णय गरिएको हो । 

त्यसअघि, सांसद नारायणी शर्माले घोराही सिमेन्टको आईपीओका विषयमा प्रश्न उठाएकी थिइन् । महँगो मूल्य भएकाले कम्पनीको आईपीओमा स्थानीयले आवेदन दिन नसकेको उनले उल्लेख गरिन् । सो विषयमा धितोपत्र बोर्डका अध्यक्षलाई बोलाएर जवाफ लिनुपर्नेमा उनले जोड दिइन् । सांसद ज्ञानेन्द्र शाही र पूर्णबहादुर तामाङले पनि बैंकको कार्यक्षमतामा प्रश्न उठाएका थिए ।