खाँदबारीमा खानेपानीको हाहाकार, यसरी गरियो नगरमा पानी वितरण

२९ जेठ, खाँदबारी । सुख्खा लागेर पानीको मुहान सुकेपछि संखुवासभाको खाँदबारी नगरपालिकाले खोलाको पानी ल्याएर दमकलबाट वितरण सुुरु गरेको छ ।

खाँदबारीबाट १६ किलोमिटर टाढा रहेको सभाखोलाको पानी २ वटा दमकल र साना पानी ट्यांकरबाट ल्याएर शुक्रबारबाट बजारबासीलाई पानी बितरण सुरु गरिएको नगर प्रमुख महेश थपलियाले बताए । दमकलबाट ल्याइएको पानी टोलटोलमा लगेर आवश्यकता अनुसार वितरण भइरहेको छ । 

नगरपालिकाले खाँदबारीमा रहेको सेनाको व्यारेकको एक लाख लिटरको ट्यांकीमा पनि पानी संकलन सुरु गरेको छ । शुक्रबारबाट दैनिक ३० देखि ५० हजार लिटरपानी खाँदबारीका टोलटोलमा दमकलबाट पुर्याइएको नगरपालिकाले जनाएको छ । खाँदबारीमा ल्याइएको खानेपानीका मुहान सुकेकाले नगर क्षेत्रमा पानीको हाहाकार भएको हो ।