काठमाडौंको भोटेवहालबाट १३ जुवाडे पक्राउ

३० जेठ, काठमाडौं । नेपाल प्रहरीले काठमाडौंको भोटेवहालबाट जुवातास खेलिरहेको अवस्थामा १३ जना जुवाडेलाई पक्राउ गरेको छ । काठमाडौं महानगरपालिका -११ भोटेवहाल शान्तिमार्ग बस्ने शेर बहादुर शेरचनको घरमा जुवातास खेलिरहेको अवस्थामा बाग्लुङ ढोरपाटन नगरपालिका-१ घर भई सोही ठाउँमा डेरा गरी बस्ने ५२ वर्षीय दिनेश शेरचनसहित १३ जनालाई प्रहरीले सोमबार साँझ प्रहरीले पक्राउ गरेको जनाएको छ ।

विशेष सूचनाको आधारमा प्रहरी वृत्त कालिमाटीबाट खटिएको प्रहरीले उनीहरूलाई नगद १ लाख ६७ हजार रूपैयाँ,  १६ बुक तास, जुवा खेल्न प्रयोग भएको विभिन्न रङ्को कोईन १ सय १९ थान र जुवाको हिसाब राखेको कपीसहित फेला पारी पक्राउ गरेको हो । यस सम्बन्धमा प्रहरीले थप अनुसन्धान गरिरहेको छ ।