निगमलाई ५० वटा जहाज आवश्यक छ तर, स्वार्थ समूह नयाँ थप्न नदिने षडयन्त्रमा छः मन्त्री किराती

३० जेठ, बुटवल । संस्कृति पर्यटन तथा नागरिक उड्डयन मन्त्री सुदन किरातीले नेपाल वायु सेवा निगमलाई साना ठूला गरी ५० वटा जहाज आवश्यक हुने बताएका छन् । उनले सरकारले निगम सञ्चालन गर्ने नै हो भने ५० वटा जहाज अनिवार्य चाहिने बताएका छन् । जहाज थपेर व्यवस्थापन चुस्त बनाए निगमले धेरै ठूलो नाफा दिनसक्ने उनको भनाइ छ । 

नेपाल वायु सेवा निगमको विमान मलेसियाबाट गौतमबुद्ध अन्तर्राष्ट्रिय विमानस्थल भैरहवामा अवतरण गरेपछि मंगलबार बिहान विमानस्थलमा आयोजित पत्रकार सम्मेलनमा मन्त्री किरातीले नयाँ जहाज थप्न आवश्यक भएपनि थप्न नदिने षड्यन्त्र भइरहेको बताए । नयाँ जहाज नकिन्ने भए निगम र मन्त्रालय खारेज गरिदिए हुने भनाइ छ । 

मन्त्री किरातीले निजी विमान कम्पनीको स्वार्थमा निगमलाई नयाँ जहाज थप्न नदिने षड्यन्त्र भएको बताए । उनले भने, ‘जहाज किन्नैपर्छ अन्यथा मन्त्रालय खारेज गरे हुन्छ । किन्न नदिन थुप्रै षड्यन्त्रहरु छन् तर ऐनअनुसार कुनै दाग नलाग्ने गरी पारदर्शी ढंगले खरिद गर्नैपर्छ ।’ निजी कम्पनीको भाडादर ज्यादै महँगो भएकाले निगमले जहाज थपेर सस्तो दरमा सेवा दिनुपर्ने मन्त्री किरातीले बताए । उनले साना–ठूला गरी कम्तीमा ५० वटा जहाज निगमको हुनुपर्ने दावी गरे । 

बौद्ध धर्मावलम्बीको बाहुल्य भएका थाइल्यान्ड, कम्बोडिया, श्रीलंकामा सिधा हवाई उडानका लागि पनि पहल भइरहेको र भारतसँग हवाई रुटको अनुमति लिन सरकारले प्रयास गरिरहेको भन्दै उनले छिट्टै गौतम बुद्ध अन्तर्राष्ट्रिय विमानस्थलबाट नियमित उडान हुने बताए ।