मधेशका मुख्यमन्त्रीले विश्वासको मत मागेपछि माओवादीमा धर्मसंकट

३० जेठ, जनकपुरधाम । मधेस प्रदेशका मुख्यमन्त्री सरोज कुमार यादवले विश्वासको मत लिने भएका छन् । नेकपा एमालेले समर्थन फिर्ता लिएपछि उनले अपराह्न ५ बजे बोलाइएको प्रदेशसभामा बैठकमा यादवले विश्वासको मत लिन लागेका हुन् । उनले विश्वासको मत लिने भएपछि माओवादी संकटमा परेको छ । 

अहिले जसपा र माओवादीबीच सम्बन्ध राम्रो छैन् । माओवादी जसपासँग असन्तुष्टि राखेर प्रदेशसभाको बैठक पनि बहिस्कार गर्दै आएको छ । एकातिर प्रदेशका केही माओवादी नेताहरु जसपालाई विश्वासको मत दिन नहुने पक्षमा छन् भने केन्द्रमा जसपाको समर्थनमा माओवादी नेतृत्वको सरकार छ । प्रदेशमा मत नदिए केन्द्रीय गठबन्धनमा समस्या उत्पन्न हुन्छ । 

एमालेले जेठ १ गते सरकारबाट बाहिरिँदै समर्थन फिर्ता लिएको थियो । संवैधानिक व्यवस्था अनुसार सरकारमा सहभागी दलले समर्थन फिर्ता लिएमा ३० दिनभित्र मुख्यमन्त्रीले प्रदेश सभामा विश्वासको मत लिनुपर्छ । अहिलेसम्म मुख्यमन्त्री सरोजकुमार यादवलाई एमालेबाहेक सबै दलको समर्थन छ । कुल १०७ सांसद रहेको प्रदेश सभामा बहुमतका लागि ५४ जना सांसदको साथ चाहिन्छ ।

सरकारको नेतृत्व गरिरहेको जनता समाजवादी पार्टी (जसपा) र नेकपा (माओवादी केन्द्र)को सम्बन्ध निकै बिग्रिएको छ । माओवादी केन्द्रले नियमित दुईवटा प्रदेशसभा बैठक नै बहिष्कार गरिसकेको छ । डा. सीके राउत नेतृत्वको जनमत र महन्थ ठाकुर नेतृत्वको लोसपा पनि सरकारसँग असन्तुष्ट छन् । यी तीनै दलले सम्मानजनक मन्त्रालय नपाएको गुनासो गर्दै आएका छन् ।

यस्तो अवस्थामा मुख्यमन्त्रीलाई विश्वासको मत पाउन केही कठिनाइ हुने देखिन्छ । तीन दलले नै विश्वासको मत दिएनन् भने मात्र यादव नेतृत्वको सरकार संकटमा पर्छ । अहिले सरकारलाई जसपाका १८, नेपाली कांग्रेसका २२, जनमत पार्टीका १३, लोसपाका ९ र माओवादी केन्द्रका ९ सांसदको सर्मथन छन् । यीबाहेक नागरिक उन्मुक्ति, नेपाल संघीय समाजवादी, राप्रापा र तीन स्वतन्त्र सांसदले सर्मथन कायम राखेका छन् ।