१० केजीभन्दा सुन कम भेटिए फाँसीमा चढ्छुः थापा

३० जेठ, काठमाडौं । पशुपति क्षेत्र विकास कोषले पशुपतिनाथ मन्दिरमा चढाइएको सुनको जलहरीमा १० केजी नै सुन रहेको दाबी गरेको छ । मंगलबार संघीय संसद राष्ट्रियसभा अन्तरगतको राष्ट्रिय सरोकार तथा समन्वय समितिको बैठकमा कोषका सदस्य–सचिव डा. मिलनकुमार थापाले उक्त कुरा बताएका हुन् ।

सदस्यसचिव थापाले पशुपतिनाथ मन्दिरमाको ज्योतिर्लिङमा राखिएको सुनको जलहरीमा भ्रष्टाचार नभएको दाबी गरे । थापाले जलहरीमा प्रचार गरिएजस्तो १० केजी सुन कम भेटिए आफू फाँसीमा लड्किन तयार रहेको बताए । 

बैठकमा थापा आफूलाई बाहिर हिँडदा समेत सुन चोर भन्ने अवस्था आएको धन्दै आँसु खसालेका थिए । जलहरीमा १० किलो सुन गायब पारेर करोडौं रुपैयाँ भ्रष्टाचार गरेको भन्दै संसदमा समेत कुरा उठेपछि छानबिन गर्नुपर्ने आवाज सांसदहरुले उठाइरहेका छन् । 

सुन गायब पारेर भ्रष्टाचार गरेको भन्ने विषय पुष्टि गर्न समेत उनले चुनौति दिए । भ्रष्टाचार भएको प्रमाणित भए आफू फाँसीको सजाय भोग्न तयार रहेको भन्दै गलत प्रचार गरेर बद्नाम नगरिदिन आग्रह गरे । गलत प्रचारबाट आफ्ना दुईवटा बच्चालाई पर्ने नकारात्मक असरबारे ध्यान दिन आग्रह गरे ।   
 
जलहरीमा १० केजी सुन नपुगे आफू फाँसीको सजाय भोग्न तयार रहेको थापाले बताए । आफूले पटक–पटक जलहरीको सुन तौल लिन गरेको आग्रहलाई बेवास्ता गरेर राज्यले आफूलाई चोर करार गर्न खोजेको भन्दै थापाले असन्तुष्टि जनाए ।

थपाले भने, ‘९६ किलो ८२२ ग्राम सुन तयार भइसकेको छ । १० केजी भएको छैन भनेपछि हामीले त्यो माइन्युटमा नलेखेको मात्रै हो । १० केजी सुन शिवले पहिरिएर राख्नुभएको छ । जोख्दा खेरी थाहा हुन्छ नि पित्तल हाल्यो कि चाँदी हाल्यो । आज मेरो गाउँभरि बेइज्जत भयो । मेरो दुई जना सन्तान छन् । म कमजोर होइन । तर राज्यले कमजोरी बनायो । आयोगले छानबिन गर्न नपर्ने ? पटकपटक हामीलाई मुद्दा चलाउँछु भनेको छ । जोखेर मुद्दा चलाउन । यो च्यालेन्ज हो ।’

आफ्ना दुई सन्तान रहेका र उनीहरूको भविष्य समेत अन्धकार हुने गरी आफूलाई सुन चोरको आरोप लगाइएको दुखेसो पोख्दै थापाले राज्यको नीति यही हो ? भनि प्रश्न गरे ।

नेपाली सेनालाई विश्वास गर्ने कि नगर्ने भन्दै उनले यो सुनको जलहरीमा नेपाली सेना २४ घण्टा ड्युटी गरेको बताए । सेनालाई विश्वास गर्ने कि नगर्ने ? यो सुन हराएको हो भने सेनाले जिम्मा लिन पर्ने कि नपर्ने भनेर मैले प्रधानसेनापतिज्यूसँग पनि कुरा गरेको उनले बताए । 

सदस्य सचिव थापाले आफूलाई पशुपति क्षेत्रको भेटी, जग्गालगायतका सम्पत्ति दुरपयोग गरेर बाँच्नु नपर्ने पनि बताए । यो केशमा आफूले न्याय नपाएर आत्महत्याको बाटो रोज्नुपर्ने अवस्था आएको हो र ? भनि सांसदहरूलाई प्रश्न गरे ।

‘म यो सुनको जलहरी समितिको संयोजक हो । यसमा नेपाल राष्ट्र बैंकले दिएको सम्झौताअनुसार हामीले सुन लिएर आएका छौँ –१०३ केजी । त्यतिखेर हामी एउटा राज्यको निकायबाट मनोनित भएपछि हामी कर्मचारी हो । राज्यका प्रमुखहरूले जे निर्देशन दिनुहुन्छ, त्यो गर्नु के गलत हो ?’ थापाले भने, ’त्यतिखेर सम्माननीय प्रधानमन्त्री केपी ओली हुनुहुन्थ्यो । सम्माननीय राष्ट्रपति विद्या भण्डारीज्यू हुनुहुन्थ्यो । उहाँहरूको निर्देशनमा हामीलाई शिवरात्री भरिमा त्यो सकाउनु भनिएको थियो । हामीले सकायौँ । गल्ती के ग¥यौँ ?’

जलहरीको विषयमा अख्तियार दुरुपयोग अनुसन्धान आयोगले छानबिन नगरी जथाभावी आरोप लगाउन नमिल्ने थापाको भनाइ छ । त्यस सम्बन्धमा आफूले महालेखा परीक्षकको कार्यालयमा यथार्थ जानकारी गराउँदा पनि गलत ढंगले प्रतिवेदन आएको उनको दावी छ ।