यात्रुवाहक बसबाट ५५ लाख मूल्यको सुनसहित युवक पक्राउ

३१ जेठ, काठमाडौं । मकवानपुरमा यात्रुवाहक बस चेकजाँचका क्रममा एक यात्रुलाई झण्डै ५५ लाख मूल्यको अवैध सुनसहित प्रहरीले पक्राउ गरेको छ । 

हेटौंडा उपमहानगरपालिका–१५, रातोमाटेबाट जिल्ला प्रहरी कार्यालयको टोलीले झन्डै साढे करिब ५५ लाख रुपैयाँ बराबरको अवैध सुनसहित वीरगन्ज महानगरपालिका-१६ का २२ वर्षीय किसन साहलाई पक्राउ गरेको हो । 

आज बिहान रातमाटे चेकपोष्टमा प्रदेश २–०३–००१ ख ०१५९ नम्बरको बस चेकजाँच गर्दा ३ बजे ५४ लाख ४८ हजार रुपैयाँ बराबरको ५६१ ग्राम अवैध सुन बरामद गरेको जिल्ला प्रहरी कार्यालय मकवानपुरले जनाएको छ । अभियुक्त साहले जुत्ताको नोकभित्र उक्त परिमाणमा सुन लुकाएर ल्याइरहेको अवस्थामा फेला परेको प्रहरीको दाबी छ । 

साहलाई बरामद सहित पक्राउ गरी आवश्यक अनुसन्धान अगाडि बढाइएको प्रहरीले जनाएको छ । पक्राउ परेका अभियुक्त साहलाई आजै सार्वजनिक गरिएको छ ।

सुन काठमाडौं ल्याउने क्रममा रहेको र कसलाई दिन ल्याइएको हो भन्नेबारे खुलिनसकेको बताइएको छ । साह भरियामात्र हुन् या कारोबार भन्नेबारे गहिरो अनुसन्धान भइरहेको जनाइएको छ ।

यस्तै, सोही चेकपोष्टबाट वीरगञ्जबाट पोखरातर्फ जाँदै गरेको ग २ ख ६९२ नम्बरको यात्रुबाहक बसको डिक्कीभित्र लुकाएर ल्याइएको अवस्थामा १०० थान साडी र ६०० थान सल बरामद गरिएको छ । उक्त सामान करिब एक लाख ५ हजार रुपैयाँ बराबर मूल्यको रहेको प्रहरीले जनाएको छ ।