एमालेको नेतृत्व परिवर्तन भए नेकपा जन्माउन सकिन्छः प्रचण्ड

३१ जेठ, काठमाडौं । प्रधानमन्त्री एवं नेकपा माओवादीका अध्यक्ष पुष्पकमल दाहाल प्रचण्डले नेकपा एमालेको नेतृतव परिवर्तन भए पहिलेको जस्तै नेकपा व्युताउन सकिने बताएका छन् । उनले समाजवादी मोर्चा हुँदै नया नेकपा बनाउने तयारी भइरहेको बताएका छन् । प्रचण्डले एमालेसहितको मोर्चा बनाउन भने उसको नेतृत्व परिवर्तन हुन आवश्यक रहेको बताएका छन् ।   

नेकपा माओवादी केन्द्र जिल्ला समन्वय समिति दाङले बुधबार आयोजना गरेको अगुवा कार्यकर्ता भेलामा बोल्दै प्रचण्डले समाजवादी क्रान्तिको तयारीका लागि समाजवादी संयुक्त मोर्चाको तयारी भइरहेको बताए । उनले नेकपा एमालेमा पनि एकताका पक्षधर रहे पनि मूल नेतृत्व नै एकताको बाधक देखिएको बताए । एमालेमा पनि एकताका पक्ष्ँधर भएको तर, नेतृत्व बाधक भएको बताए ।  

प्रचण्डले भने, ‘फेरि एकताका लागि पहल गर्नुपर्ने छ । एमालेमा पनि एकताका पक्षधरहरू छन् । उनीहरूको नेतृत्व परिवर्तन भएमा एमाले पनि एकताको पक्षमा आउँछ । त्यहाँ मुख्य नेतृत्व नै मूलरूपमा एकताको बाधक देखिन्छ । त्यसकारण एमालेसहितको मोर्चा बन्न अहिलेको नेतृत्वले हटाइनुपर्छ । उनले एमाले अध्यक्ष केपी शर्मा ओलीको नाम नलिएपनि नेकपा बनाउने कुरा एमालेमा अहिलेको नेतृतव रहेसम्म  सम्भव नहुने बताए ।  
 
मोर्चाको दस्तावेजसमेत टुंगो लगाइसकेको जानकारी दिँदै प्रचण्डले भने, ‘हाम्रो पार्टी, माधव नेपाल, बाबुराम भट्टराई, विप्लव, वामदेव गौतम, उपेन्द्र यादवहरूले नेतृत्व गरेका शक्तिबीच केही दिनमा समाजवादी मोर्चा घोषणा हुन्छ । तल्लो तहसम्म समाजवादी मोर्चा बन्छ ।’

विगतमा नेकपा एमालेसँग एकता गरेर नेकपा बनाए पनि सफल नभएको भन्दै उनले फेरि नेकपा बनाउने कोसिस भइरहेको बताए । ‘हिजोको एकता कायम राख्न सम्भव भएन,’ उनले भने, ‘फेरि नेकपा बनाउने कोसिस भइरहेको छ । यसभित्र ठूलो अर्थ छ ।’ जनताको ठूलो हिस्सालाई संगठित नगरी समाजवादी क्रान्तिको आधार तयार पार्न नसकिने भन्दै उनले त्यसका लागि सच्चा वामपन्थी र कम्युनिस्टहरूबीच एकताका लागि व्यापक बहस चलाउने बताए ।