प्राध्यापकलाई कालो मोसो दल्ने नेविसंघका जिल्ला सभापति पक्राउ

३१ जेठ, काठमाडौं । पूर्वाञ्चल विश्वविद्यालय सेवा आयोगका अध्यक्ष प्राडा महेश दाहाललाई कालोमोसो दलेको आरोपमा मोरङ प्रहरीले एक जनालाई गिरफ्तार गरेको छ । 

अध्यक्ष दाहाललाई कालो मोसो दलेको आरोपमा नेपाल विद्यार्थी संघ मोरङका सभापित सरोज पोखरेललाई गिरफ्तार गरेको हो । पोखरेललाई आज बिहान मोरङको बूढीगंगाबाट गिरफ्तार गरिएको प्रहरीले जनाएको छ । आरोपी पोखरेललाई जिल्ला प्रहरी कार्यालय सुनसरीमा राखिएको छ । 

आयोग अध्यक्ष दाहालमाथि सोमबार नेविसंघका कार्यकर्ताले निवासमै पुगेर कालोमोसो दलेका थिए । घटनाको जिम्मा पोखरेलले लिएका थिए । मोसो दल्ने घटनामा अन्य व्यक्तिहरुको पनि संलग्नता रहेको र उनीहरुको खोजी कार्य भइरहेको प्रहरीले जनाएको छ । आयोगको कार्यालयले पोखरेलसहित ३ जनाविरुद्ध प्रहरीमा उजुरी दिएको बताइएको छ । 

घटनापछि नेपाल विद्यार्थी संघमा दुई धार देखिएको छ । जिल्ला संगठनले घटनाको जिम्मा लिएपनि नेविसंघका केन्द्रीय अध्यक्ष दुजाङ शेर्पा मंगलबार विज्ञप्ति निकालेर मोसो दल्ने नीति संघको नरहेको र उक्त दाहालमाथि मोसो दिलिएको घटनमा संघको संलग्नता नरहेको बताएका थिए । मोसो दल्ने कार्यलाई उनले ‘अमावीय कार्य’को संज्ञा दिएका थिए ।

अध्यक्ष शेर्पाले घटनाको निष्पक्ष छानबिन गरी सत्यतथ्य बाहिर ल्याउन एक हप्ताको समयसीमा तोकेर विद्यार्थी नेता दिनेश शाही संयोजक र दीपेन रौनियार र दीपेन घले सदस्य रहेको छानबिन समिति गठन गरेको जानकारी समेत दिएका थिए । साथै घटनाको जिम्मेवारी घटनामा संलग्नहरु नै हुनुपर्ने बताएका थिए ।