वैधानिकताको प्रश्न उठाउँदै एक थरी उजुरीकर्ताले बहिष्कार गरे संसदीय सुनुवाइ समितिको बैठक

३१ जेठ, काठमाडौं । प्रधानन्यायाधीमा सिफारिस भएका कामु प्रधानन्यायाधीश हरिकृष्ण कार्कीविरुद्ध उजुरी दिने उजुरीकर्ताहरूसँग संसदीय सुनुवाइ समितिले गरेको छलफल टुंगोमा नपुगेर भाँडिएको छ । एकथरी उजुरीकर्ताले संसदीय समितिको वैधानिकतामा प्रश्न उठाउँदै समिति बहिष्कार गरेका छन् ।

प्रस्तावित प्रधानन्यायाधीश कार्कीविरुद्धका उजुरीकर्ता विभाजित भएका छन् । बुधबार सिंहदरबारमा बसेको संसदीय सुनुवाइ समितिको बैठकमा उनीहरूले सामूहिक रूपमा प्रवेश पाउनुपर्ने बताएका थिए । 

समितिको कार्यविधि पनि आफूहरूको संलग्नतामा बनाउनुपर्ने उजुरीकर्ताको अडान थियो । अडान राख्ने समूह सुनुवाइ समितिको वैधानिकतामै प्रश्न उठाउँदै बहिष्कार घोषणा गरेर हिँडेको छ । अर्को समूह समितिको बैठकमा प्रवेश गरेको छ ।

संसदीय सुनुवाइ समितिले बुधबार उजुरीकर्ताहरूलाई उजुरीबारे प्रस्टीकरणका लागि समितिमा बोलाएको थियो । एक–एक गरी समिति बैठकमा गएर आफ्नो उजुरीबारे स्पष्ट पार्ने कार्यतालिका समितिले बनाएको थियो । तर, उजुरीकर्ताले त्यसलाई अस्वीकार गर्दै समितिको वैधानिकतमा प्रश्न उठाए ।

संसद्को संयुक्त बैठक तथा संयुक्त समिति कार्यसञ्चालन नियमावली राजपत्रमा प्रकाशित नभएकाले समिति नै वैधानिक नभएको उनीहरूको दाबी छ । सुरुमा उनीहरूले सामूहिक रूपमा प्रवेश पाउनुपर्ने माग राखेर बैठक कक्षको ढोकाबाहिरैबाट विरोध गरेका थिए ।

पछि उजुरीकर्ताकोतर्फबाट तीनजनाले बोल्ने सहमति भएपछि उनीहरूलाई बैठक कक्षमा प्रवेश गर्न दिइएको थियो । तर, बैठक कक्षमा उजुरीकर्ताहरूले समितिको वैधानिकता नै नरहेकाले सुनुवाइ गर्न नपाउने अडान लिएका उजुरीकर्ताहरू समिति नै बहिष्कार गरेर बाहिरिएका थिए ।   

बुधबार बिहान २३ जना उजुरीकर्तालाई संसदीय सुनुवाइ समितिले छलफलका लागि बोलाएको थियो । सुनुवाइ समितिले उजुरीकर्ता प्रत्येकलाई १० मिनेट समय दिँदै गोप्य छलफल गरिरहँदा उजुरीकर्ताको समूहले समिति नै अवैध भन्दै विरोध जनाएका थिए । 

’हामीले संसदीय सुनुवाइ समिति नै अवैध छ भनेर सर्वोच्चमा उजुरी दिएका थियौं । तर सर्वोच्चले नवौं दिनमा आएर दरपिठ गरिदियो,’ उजुरीकर्तामध्येका एक वरिष्ठ अधिवक्ता ध्रुवलाल श्रेष्ठले बताए ।

समितिले छलफलका लागि आह्वान गर्दा उजुरीकर्ताहरूले भने आफूहरूलाई सामूहिक रुपमा बोल्न दिनुपर्ने भन्दै आपत्ति जनाएका थिए । अहिले उनीहरूसँग समितिका सचिव पद्मप्रसाद पाण्डेले समन्वय गरिरहेका छन् ।

सुनुवाइ समितिको जेठ १६ को बैठकले जेठ २६ भित्रको समय तोक्दै कार्कीविरुद्ध उजुरी आह्वान गरेको थियो । कार्कीको बिहीबार संसदीय सुनुवाइ हुने तयारी भइरहँदा समितिले बुधबार उजुरीकर्ताहरूलाई छलफलमा बोलाएको थियो ।