देशलाई तरकारीमा आत्मनिर्भर बनाउने उद्देश्यले आलु र प्याजमा कर लगाएको होः अर्थमन्त्री महत

३२ जेठ, काठमाडौं । अर्थमन्त्री प्रकाशशरण महतले उत्पादन बढाउन र देशलाई तरकारीमा आत्मनिर्भर बनाउने उद्देश्यले सरकारले आलु र प्याजमा कर लगाएको बताएका छन् । सरकारको कदम मुलुकलाई आत्मनिर्भर उन्मुख गराउने उद्देश्यबाहेक यसमा अरू कुनै उद्देश्य नरहेको उनको भनाइ छ । 

बिहीबार अर्थमन्त्रालयमा किसानहरूसँगको भेटघाटमा अर्थमन्त्री महतले स्वदेशमै उत्पादन बढाउन र स्वदेशी उत्पादनलाई संरक्षण गर्नका लागि आलु, प्याजमा कर लगाएको र आयातित आलु, प्याज रोक्ने र स्थानीय उत्पादनको प्रोत्साहन तथा सरंक्षण गर्ने सरकारको मुख्य उद्देश्य रहेको बताए । यो करको व्यवस्थाले मुलतः आयातित वस्तुलाई नै महँगो बनाउँछ, स्थानीय उत्पादनलाई महँगो बनाउँदैन, उनले भने ।

उनले भने, ‘आयातको सट्टा मुलुकभित्रै उत्पादन बढाऔं, त्यसले रोजगारी पनि सिर्जना हुन्छ । उत्पादनकर्ता पनि उत्साहित हुन्छन् । नेपाल आत्मनिर्भरता तर्फ उन्मुख हुन्छौं भनेर प्रस्ताव गरिएको हो ।’  महतले सरकारले विगतमा कृषि क्षेत्रमा दिएको अनुदान वास्तविक किसानले नपाएको बताए । उनले अब उत्पादनमा आधारित भएर मात्रै अनुदान दिइने बताए ।

‘सरकारले कृषि क्षेत्रमा दिने अर्बौँ अनुदानको सदुपयोग भएन, दुरुपयोग भयो’ उनले भने ‘कागज देखाएर मात्रै अनुदान लिएका थिए, अब त्यसरी हुँदैन । उत्पादनमा नै अनुदान दिने हो ।’ कृषिलाई एक तहको संरक्षण दिनुपर्ने मान्यताका साथ २०८० को आर्थिक विधेयक प्रस्तुत गरिएको उनको भनाइ छ ।