सर्वोच्चको प्रधानन्यायाधीशमा हरिकृष्ण कार्कीको नाम अनुमोदन

१ असार, काठमाडौं । संसदीय सुनुवाइ समितिले प्रधानन्यायाधीशमा हरिकृष्ण कार्कीलाई अनुमोदन गरेको छ । सुनुवाइ समितिको शुक्रबारको बैठकले कार्कीलाई सर्वसम्मतिले प्रधानन्यायाधीशमा अनुमोदन गरेको हो । संवैधानिक परिषदबाट प्रधानन्यायाधीशमा सिफारिस हरिकृष्ण कार्कीको नाम सर्वसम्मतिले स्वीकृत गरिएको समिति सभापति पशुपति शमशेर जबराले जानकारी दिए । 

संसदीय सुनुवाइ समितिले बिहीबार र शुक्रबार प्रधानन्यायाधीशमा प्रस्तावित कार्कीसँग कार्य योजना लिने र प्रश्नोत्तर गरेको थियो । संसदीय सुनुवाइ समितिमा कार्कीविरुद्ध बहालवाला जिल्ला न्यायाधीशसहितका २९ वटा उजुरी परेका थिए ।

कार्की सर्वोच्च अदालतमा छोटो कार्यकाल नेतृत्व गर्नेछन् । ८ महिना कायममुकायम भएर सर्वोच्चको नेतृत्व गरेका उनी साउन २० गते अनिवार्य अवकाशमा जाँदैछन् । सुनुवाइका क्रममा उजरी कर्ता न्यायाधीश श्रीकृष्ण भट्टराईको विषयमा प्रश्न राखेपछि उनले न्याय परिषदले गम्भीरतापूर्वक छानबिन गर्ने बताए । न्यायाधीशको अनुशासनमा रहेको हो कि होइन भन्ने विषयमा न्यायपरिषदमा नै कुरा हुने उनको भनाइ थियो । 

जिल्ला अदालत अर्घाखाँचीमा कार्यरत न्यायाधीश श्रीकृष्ण भट्टराईले प्रस्तावित प्रधानन्यायाधीश विरुद्ध उजुरी मात्रै दर्ता गरेको नभइ संसदीय सुनुवाइ समितिलाई समेत प्रभावित पार्ने खोजेको सांसदहरूले बताएका थिए ।