सरकारको बजेट फागुन ल्याउने व्यवस्थाका लागि बहसमा उत्रिए सांसदहरु

१ असार, काठमाडौं । सरकारले हरेक नयाँ आर्थिक वर्षका लागि ल्याउने बजेट मिति परिवर्तनबारे संसदमा बहस सुरु भएको छ । शुक्रबार प्रतिनिधिसभाको बैठकमा बजेट विनियोजन विधेयकमाथि छलफलमा भाग लिएका सत्ता पक्ष र प्रतिपक्षी दल सांसदहरुले बजेट वक्तव्य दिने मिति फेरबदल गर्नुपर्नेमा जोड दिँदै धारणा राखे । 

नेपाली कांग्रेसका सांसद श्यामकुमार घिमिरले अहिले संवैधानिक व्यवस्था जेठ १५ मा आगामी आवको बजेट सार्वजनिक गर्नुपर्ने अवस्थाले बजेट तयारीमा अनावश्यक दबाब र चलखेल बढाएको धारणा राखे । 

उनले विषयगत मन्त्रालयबाट फागुन महिनामै बजेटको सिलिङ तोकिसक्नुपर्ने, चैत महिनाभित्र सरकारले बजेटको प्रारम्भिक अंक टुंग्याएर अर्थ समितिमा छलफल सकेर बैशाखको सुरुवातमै बजट घोषणा हुने व्यवस्था बनाउनुपर्ने बताए ।

उनले सरकारले ल्याएको आगामी आवको बजेट आवश्यकतामा आधारित नरहेको बताए । ‘एक अर्ब लाग्ने ठाउँमा १० लाख हाल्द्या छ, नचाहिने ठाउँमा एक अर्ब हाल्द्या छ’ उनले भने, कहीं बेस्सरी हल्द्या छ, कही छँदैछैन । अहिलेको बजेटले खती निम्त्याउने पक्का छ ।’ आफू सत्ता पक्षकै सांसद भइकन पनि पूर्वाधार विकासमा बजेट नपाएको भन्दै गुनासो गरे ।

उनले बजेट रकममा नेता मन्त्री र शक्तिशाली व्यक्तिहरुको मनोमानी चलेको र यसैकारण सत्तारुढ दलकै सांसदहरुबीच आक्रोश पैदा भइरहेको उनको टिप्पणी छ । 

सांसद घिमिरेभन्दा अगाडि बोल्ने सांसदहरुले पनि बजेट भाषण प्रणालीमा व्यापक परिवर्तन आवश्यक रहेको बताउँदै अव्यवहारिक व्यवस्था संशोधन गर्नेतर्फ भूमिका खेल्न सदनलाई आग्रक गरेका थिए ।