बाबुरामले प्रचण्डलाई भेटेपछि  रोकियो समाजवादी मोर्चा घोषणा कार्यक्रम, नेतृत्वमा अझै विवाद

१ असार, काठमाडौं । नजन्मँदै समाजवादी मोर्चा गठनको विषय विवादमा आएको छ । आन्तरिक विवाद नमिलेका कारण सत्तारुढ नेकपा माओवादी केन्द्रसहितका दलहरूले बनाउने भनेको समाजवादी मोर्चा घोषणा कार्यक्रम रोकिएको छ । मोर्चा आज घोषणा गर्ने भनिएको थियो । 

मोर्चाको नेतृत्वमै सहमति नजुटेको बताइएको छ । पहिले मोर्चाको नेतृत्वमा प्रधानमन्त्रीसमेत रहेका नेकपा माओवादीका अध्यक्ष पुष्पकमल दाहाल प्रचण्ड बस्ने भनिएको थियो । तर, उनी प्रधानमन्त्री भएकाले अरू ठूलो जिम्मेवारी नभएका नेताले नेतृत्व पाउने पर्ने भनाई अरू नेताको छ । 

मोर्चाको नेतृत्वमा नेकपा एकीकृत समाजवादीका अध्यक्ष माधव कुमार नेपाल र नेसपाका अध्यक्ष डा. बाबुराम भट्टराई इच्छुक छन् । भट्टराई हिजोसम्म मोर्चामा बस्न तयार देखिएका थिएनन् । तर, उनले आज नेतृत्वको दावी गर्दै प्रधानमन्त्री प्रचण्डसँग भेट गरेका छन् । भट्टराईसँग भेटे भएपछि प्रचण्डले मोर्चा घोषणा आज रोक्नुपर्ने बताएका छन् । 

प्रधानमन्त्री प्रचण्डसँग भेटेपछि भट्टराई मोर्चामा आउन सहमत भएका थिए । समाजवादी मोर्चामा नेकपा माओवादी, नेत्रविक्रम चन्द ‘विप्लव’ नेतृत्वको नेकपा, उपेन्द्र यादव नेतृत्वको जनता समाजवादी पार्टी, माधव नेपाल नेतृत्वको नेकपा एकीकृत समाजवादी लगायतका दलहरू रहेका छन् । हाल ३२ सिटमा सीमित रहेको माओवादी समाजवादी मोर्चा बनाएर ५५ सीटको बलियो आधार बनाउन खोजिरहेको छ । 

समाजवादी मोर्चा भित्रकै एक नेताले घोषणा हुनु पूर्व केही विवाद रहेको बताए । उनले मोर्चा घोषणा हुनुभन्दा अगाडि कम्युनिष्ट भन्ने नेताहरूमा सामन्तवादी दुर्गुणहरुबारे छलफल हुनुपर्ने बताए । मोर्चा घोषणाभन्दा अगाडि नै  पद र पोजिसन एक आपसका अन्तरविरोध, झगडा र प्रतिस्पर्धाबारे छलफल सामूहिक रुपमा नभएको उनले बताए । 

अहिलेको समाजवादी मोर्चामा सहभागी हुनका लागि नेकपा एमालेमा भने प्रस्ताव पठाइएको छैन । साना–साना टुक्राटुक्री भएर दोकान खोलेर बस्नु भन्दा वामपन्थी पार्टीहरू एक हुँदै जानु राम्रो भएपनि  एमालेको नेतृत्व खराब भएकाले प्रस्ताव नपठाइएको हो । नेकपा माओवादीले केपी शर्मा ओलीको व्यक्तिगत व्यवहार र प्रवृत्तिका कारण एमालेलाई समाजवादी मोर्चामा समावेश गराउन नसकिने बताइरहेको छ । 

एकीकृत समाजवादीका नेता जगन्नाथ खतिवडाले दलहरूको आन्तरिक तयारी नपुगेकाले आज मोर्चा घोषणा नसकेको बताएका  छन् । उनले अझै एक–दुई दिन लाग्ने बताए । मोर्चाबारे छलफल गर्न आज एकीकृत समाजवादीको केन्द्रीय सचिवालयको अनौपचारिक बैठक पनि बसेको थियो । 

बैठकमा सो पार्टीका सम्मानित नेता झलनाथ खनाल र महासचिव घनश्याम भुसाल अनुपस्थित रहेकाले औपचारिक निर्णय नगरेपनि मोर्चामा सामेल हुने र छिटो घोषणा गर्नका लागि पहलकदमी लिने सर्वसम्मत निर्णय भएको खतिवडाले जानकारी दिए । पहिले अध्यक्ष वा संयोजक को बन्ने भन्ने विवाद नमिलेसम्म मोर्चा घोषणा नहुने देखिएको छ ।