मालपोत कार्यालय भ्रष्टाचारको अखडा बन्यो : सांसद केसी

१ असार, काठमाडौं । नेपाली कांग्रेसका सांसद अर्जुननर सिंह केसीले मालपोत कार्यालय भ्रष्टाचारको अखडा बनेको बताएका छन् । शुक्रबार प्रतिनिधिसभाको बैठकमा मन्त्रालयगत बजेट विनियोजन विधेयकमाथि छलफल भाग लिँदै भूमि व्यवस्था, सहकारी तथा गरिबी निवारण मन्त्रालयमा विनियोजित बजेट रकमबारे धारणा राख्दै सांसद केसीले यस्तो बताएका हुन् । 

मालपोत कार्यालयमा सेवाग्रही कर्मचारीलाई घुस नखुवाएसम्म काम नबन्ने घटना व्यापक बनेको बताउँदै जग्गा नापीदेखि कानूनले तोकेको जग्गा खरिदबिक्री र कित्ताकाटमा ठूलो मात्रामा भ्रष्टाचार भइरहेको बताए । ‘अहिले मालपोत कार्यालय भ्रष्टाचारको अखडा बनेको छ’ उनले भने, ‘यसलाई रोक्न भूमि व्यवस्था मन्त्रालयले आगामी आवमा कडा व्यस्वस्था ल्याउन सुझाव दिए ।

उनले सुकुम्वासी समस्या समाधानका लागि बजेट नआएको भन्दै गरिबी निवारणसम्बन्धी ठोस कार्यक्रमसहित बजेट आउन नसकेको बताए । आफू सत्ता पक्षका सांसद भएर पनि बजेटका ेविरोध गर्नु पर्दा साह्रै नमिठो लागेको बताए । 

उनले चालु आवमा ५ अर्ब रुपैयाँ ठेक्का लागेर काम चलिरहेको अयोजनामा बजेट शून्य बनाएको भन्दै आक्रोश पोखे । अनावश्यक योजनामा भने १० गुणा बढी बजेट छुट्याएर असन्तुलित  रुपमा बजेट वितरण गरिएको बताए । ‘अहिले म सत्ता पक्षका सांसद भएर मात्र हो, प्रतिपक्षीमा भएको भए मैले के गरिसक्थेँ, त्यो यहाँ नभनूँ’ सांसद केसीले भने ।