सरकारले बजेट ल्याएको होइन, लुटेको छ : सिके राउत

१ असार, काठमाडौं । सत्तारुढ दल जनमत पार्टीका अध्यक्ष समेत रहेका सांसद चन्द्रकान्त (सिके) राउतले सरकारले बजेट ल्याएको नभई लुटेको बताएका छन् ।

शुक्रबार प्रतिनिधिसभाको बैठकमा मन्त्रालयगत विनियोजन विधेयकमाथिको छलफलमा भाग लिँदै सांसद राउतले सरकारले आगामी आर्थिक वर्ष २०८०/८१ को बजेट विभेदकारी र पहुँचवाला केन्द्रित रहेको बताए । 

उनले मधेश प्रदेशका जनतमाथि बजेटमार्फत सरकारले ठूलो अन्याय गरेको बताए । भौतिक मन्त्रालयका लागि छुट्याइएको ५ अर्ब १७ करोडको ५१ प्रतिशत बजेट प्रधानमन्त्री, अर्थमन्त्री, भौतिक पूर्वाधारमन्त्री र कांग्रेस सभापतिको गृहजिल्लामा खन्याएको बताए । 

सरकारले सार्वजनिक गरिसकेको बजेट संशोधन नहुने अवस्थाबीच सांसदहरुले संसदमा छलफल गरेर समय मात्र बर्बाद गरिरहेको औल्याउँदै अब बजेट तर्जुमा र घोषणा व्यवस्था नै परिवर्तनबारे बहस सुरु गर्नुपर्ने बताए । उनले बजेटमा विभेद, शासनमा अन्याय र अधिकारमाथि दमन हुने स्थिति आउनुमा अहिलेका व्यवस्था रहेको उनको भनाइ थियो ।

‘यो सरकार पनि विगतका सरकारझैं बजेट लुट्नमा लागेको छ, यो अनौठो कुरा होइन, तर अन्यायले सीमा नाघेको दिन को कहाँ पुग्छन् थाहा हुँदैन’ उनले चेतावनीपूर्ण भाषामा भने ।

सरकारमा बस्नेहरु सधैं सरकारमा नरहने र जनताको पाला पनि आउने भन्दै बजेटलाई अहिलेकै अवस्थामा समर्थन गर्न नसकिने बताए ।