जसपाले बोलायो विधान अधिवेशनअघि केन्द्रीय समितिको बैठक

१ असार, काठमाडौं । सत्तारुढ जनता समाजवादी पार्टी (जसपा) नेपालले पार्टीको केन्द्रीय समितिको बैठक असार ९ गतेका लागि बोलाएको छ । विधान अधिवेशनको तयारी लगायतका विषयमा छलफल गर्न बैठक आह्वान गरिएको पार्टीका केन्द्रीय प्रचार विभाग प्रमुख पूर्ण बस्नेतले जानकारी दिए । जसपामा ४२३ जना केन्द्रीय समिति सदस्य छन् ।

बैठकमा केन्द्रीय कार्यकारिणी समितिले विभिन्न समिति र सङ्ठनहरुले पठाएका सुझाव समेटेर तयार पारेको संशोधित विधानबारे छलफल हुने उनले बताए । जसपाले यही असार १०, ११ र १२ गते  काठमाडौ.मा विधान अधिवेशन गर्ने भएको छ । 

विभिन्न समिति र सङ्गठनबाट गरी ७७८ जना प्रतिनिधि विधान अधिवेशनमा सहभागी हुँदैछन् । केन्द्रीय समिति विधान अधिवेशन आयोजक समितिका सबै सदस्य विधान अधिवेशनका प्रतिनिधि हुने प्रावधान छ ।