मेयर बालेनलाई उड्डयन प्राधिकरणको स्पष्टीकरण पत्रः ‘तपाईँलाई सजाय किन गर्ने ?’

१ असार, काठमाडौं । नेपाल नागरिक उड्डयन प्राधिकरणले काठमाडौं महानगरपालिकाका मेयर बालेन्द्र साह (बालेन)लाई ७ दिने स्पष्टीकरण सोधेको छ ।

उड्डयन प्राधिकरणले विमानस्थलको क्षेत्रभित्र निर्माणाधीन भवनको निर्माण रोक्न निर्देशन दिएको र सुरक्षाका लागि लगाइएको तारबार काटेर लगेको भन्दै त्यसमा संलग्न भए नभएकाबारे शुक्रबार स्पष्टीकरण माग गरेको हो ।

प्राधिकरणले काठमाडौं महानगरपालिका–९ मा रहेको आफ्नो जग्गामा बनाइरहेको कम्प्लेक्सको नक्सा पास नभएको बिहीबार काठमाडौं महानगरको नगर प्रहरीको टोलीले निर्माण रोकेको थियो । महानगर प्रहरीको टोलीले प्राधिकरणले सुरक्षाका लागि लगाएको तार काटेर हटाएको थियो । 

प्राधिकरणले निर्माण रोक्नुअघि महानगरले कुनै जानकारीसमेत नदिएको र कर्मचारीले काम नरोक्न आग्रह गर्दा लिखित पत्र र आधिकारिक जानकारी माग गर्दा नगर प्रमुखको आदेश बमोजिमको काम भएर त्यहीँ गएर बुझ्न भनिएको व्यहोरा स्पष्टीकरण पत्रमा उल्लेख छ ।

साहले नेपाल नागरिक उड्डयन प्राधिरकण ऐनको दफा ७ को कसुर गरेको प्राधिकरणले दाबी गरेको छ । ‘नेपाल नागरिक उड्डयन प्राधिरकण ऐनको दफा २५ (१) बमोजिम सजाय किन नगर्ने हो  ?’ पत्रमा भनिएको छ । 

प्राधिकरणले महानगरपालिकाका नगर प्रहरी प्रमुख राजुनाथ पाण्डे र वडा नम्बर ९ का वडाध्यक्ष रामजी भण्डारीलाई पनि स्पष्टीकरण सोधेको छ ।