असार ३ गतेदेखि सामुदायिक विद्यालय अनिश्चितकालिन बन्द गर्ने घाेषणा

१ असार, काठमाडौं । विद्यालयका कर्मचारीहरुको आन्दोलनको नेतृत्व गरिरहेको नेपाल विद्यालय कर्मचारी परिषद्ले आउँदो आइतबारदेखि अनिश्चितकालिन सामुदायिक विद्यालय बन्दको घोषणा गरेको छ ।

परिषद्ले आफूहरुको मागप्रति सरकार उदासिन बनेको आरोप लगाउँदै माग सम्बोधनका लागि कडा दबाब दिन भन्दै विद्यालय बन्दको घोषणा गरेको हो । 

७७ वटै जिल्ला कार्यसमिति र ७५३ स्थानीय पालिका कार्यसमितिलाई सर्कुलरमा बन्दका कार्यक्रम सशक्त रुपमा संचालन गर्न निर्देशन दिइएको परिषद्का महासचिव शान्तिनाथ योगीद्वारा शुक्रबार जारी विज्ञप्तिमा उल्लेख छ । 
परिषद्ले सामुदायिक विद्यालयमा कार्यरत विद्यालय कर्मचारीहरुको सेवा सुविधासहित पेशागत स्थायित्व हुनुपर्ने लगायत माग राख्दै आन्दोलनमा छन् । 

सरकारले आर्थिक वर्ष २०८०/०८१ को नीति तथा कार्यक्रमको बुदाँ नम्बर १२७ मा सामुदायिक विद्यालयमा कार्यरत विद्यालय कर्मचारीहरुको सेवा सुविधाका विषयहरु सम्बोधन गरिने उल्लेख गरेपनि बजेटमा नसमेटिएको भन्दै उनीहरु आन्दोलनमा उत्रिएका हुन् ।