देशभरका सामुदायिक बिद्यालय अनिश्चितकासम्म बन्द गराउने विद्यालय कर्मचारी परिषदको चेतावनी

२ असार, काठमाडौं । नेपाल विद्यालय कर्मचारी परिषदले आइतबारदेखि अनिश्चितकासम्म देशभरका सामुदायिक विद्यालय बन्द गराउने चेतावनी दिएको छ । बिद्यालय बन्दको कार्यक्रम कार्यान्वयन गराउनका लागि परिषदले ७७ वटै जिल्ला कार्यसमिति र ७ सय ५३ स्थानीय पालिका कार्यसमितिलाई सर्कुलर पठाएको छ । 

परिषदका महासचिव शान्तिनाथ योगीका अनुसार सामुदायिक विद्यालयमा कार्यरत विद्यालय कर्मचारीहरूको विभिन्न सेवा सुविधासहित पेशागत स्थायित्वको माग राख्दै केही समयदेखि हुँदै आएको आन्दोलनप्रति सरकारले वेवास्ता गरेकाले विद्यालय बन्द गराउन लागिएको हो । 

उनका अनुसार पहिलो र दोस्रो चरणका कार्यक्रमहरू सम्पन्न भइसक्दा समेत आफ्नो मागप्रति सरकार गम्भीर नभएको तथा आन्दोलनको क्रममा उल्टै प्रहरी दमन गरे पछि पूर्व निर्धारित कार्यक्रम अनुसार असार ३ गतेदेखि सामुदायिक विद्यालय बन्द गराउन लागिएको हो ।

आर्थिक वर्ष २०८०÷०८१ को नीति तथा कार्यक्रममा सामुदायिक विद्यालयमा कार्यरत विद्यालय कर्मचारीहरूको सेवा सुविधाका विषय  सम्बोधन गरे पनि बजेट वक्तव्यमा भने उक्त विषय छुटाए पछि परिषद आन्दोलनमा उत्रिएको हो ।