माओवादी केन्द्रसहितको समाजवादी मोर्चा घोषणा असार ५ गते

३ असार, काठमाडौं । सत्तारुढ नेकपा (माओवादी केन्द्र)सहितका दल मिलेर बनाउन लागिएको समाजवादी मोर्चाको औपचारिक घोषणा यही असार ५ गते गरिने भएको छ ।

आज बिहान बालुवाटारमा प्रधानमन्त्री समेत रहेका प्रचण्ड नेतृत्वको माओवादी केन्द्र, माधवकुमार नेपाल नेतृत्वको नेकपा (एकीकृत समाजवादी), उपेन्द्र यादव नेतृत्वको जनता समाजवादी पार्टी (जसपा) र बाबुराम भट्टराई नेतृत्वको नेपाल समाजवादी पार्टी (नेसपा) र विप्लव नेतृत्वको नेकपा मिलेर तत्कालिक राजनीतिक कार्यक्रम संचालन गर्ने उद्देश्यले मोर्चा घोषणा गर्ने तयारी गरेको छ । 

असार ५ गते समाजवादी मोर्चा घोषणा गर्ने तय भएको माओवादी केन्द्रका उपाध्यक्ष एवं प्रवक्ता कृष्णबहादुर महराले जानकारी दिए । आज बिहान बालुवाटारको छलफलमा माओवादी केन्द्रबाट प्रधानमन्त्री प्रचण्ड, वरिष्ठ उपाध्यक्ष नारायणकाजी श्रेष्ठ र महासचिव देव गुरुङ तथा एकीकृत समाजवादीबाट अध्यक्ष नेपाल, जसपाबाट अध्यक्ष यादव र नेकपाबाट महासचिव विप्लव सहभागी भएका थिए । आजको छलफलमा डा. भट्टराई भने सहभागी भएनन् ।

मोर्चामा अन्य कम्युनिष्ट पार्टीलाई समावेश गर्ने प्रयास भइरहेको नेताहरुले बताएका छन् । मोर्चाले मिल्ने राजनीतिक एजेण्डा, कार्यक्रममा कार्यगत एकता र संघर्षका कार्यक्रम संचालन गरिने भएको छ ।