भाउ नपाएपछि सडकमा फालियो ३० हजार किलो गोलभेंडा

३ असार, काठमाडौं । बजारमा नबिकेपछि ३० हजार किलो गोलभेंडा कालिमाटी तरकारी बजारका किसानहरूले  सडकमा फ्याकेका छन् । बजारमा खपत कम भएको र मूल्य नपाएको भन्दै कालिमाटी तरकारी बजारमा आइतबार बिहान ठूलो संख्यामा गोलभेंडा सडकमा फ्याकिएको हो ।

सरकारले आन्तरिक उत्पादन बढाउने भनेर प्याज र आलु लगायतका तरकारीमा मूल्य अभिवृद्धि कर लगाइरहँदा किसानले कालीमाटीमा गोलभेँडा फालेका छन् । आफ्नो उत्पादनले लागतअनुसारको बजार भाउ नपाएको विरोधमा किसानले कालीमाटी फलफूल तथा तरकारी बजारमा गोलभेँडा फालेर विरोध गरेका हुन् ।
 
कालिमाटी फलफूल तथा तरकारी बजार विकास समितिका अनुसार नेपालमा उत्पादित गोलभेंडाको खपत कम भएको र मूल्य पनि नपाइएको भन्दै किसानहरूले टमाटर फ्याकेका हुन् ।

समितिका अनुसार तीन चार सय क्रेटमा भएको करिब ३० हजार जति गोलभेंडा सडकमा फ्याकिएको छ । कालिमाटी तरकारी बजार क्षेत्रको गेट तथा बजारको क्षेत्रमा गोलभेंडा फ्याकेर विरोध गरिएको समितिले जनाएको छ । 

कालिमाटी थोक तथा खुद्रा बजार समितिले आज बिहान करिब ३० हजार किलो गोलभेंडा सडकमा फ्याँकेर ‘गोलभेंडा होलिडे’ गरिएको जनाएको छ । कालिमाटी तरकारी बजारका अनुसार बजार मूल्य नपाएपछि किसानले गोलभेंडा फ्याकेका हुन् ।

करिब ३० हजार किलो गोलभेंडा कालिमाटी बजारको गेट, भित्री सडक र बजारमा फ्याँकिएको बताइएको छ । यसरी सडकमा किसानले फालेका गोलभेंडा रामकोट, नागार्जुन, थानकोट लगायतका क्षेत्रमा फलेका हुन ।

तर, किसानहरुले यति धेरै गोलभेंडा लिएर बजारसम्म नआउने भएकाले गोलभेंडा किसानले नै फ्याँकेको दाबी भने शंकास्पद छ । कालिमाटी तरकारी बजारकै केही व्यापारीहरूले भने तरकारी फ्याँक्ने कार्य बिचौलियाबाट मूल्य बढाउने उद्देश्यले गरिएको दाबी गरेका छन् ।  

सरकारले आगामी आर्थिक वर्षको आर्थिक विधेयकमार्फत आन्तरिक उत्पादन बढाउने भन्दै प्याज र आलु लगायतका वस्तुमा भ्याट लगाउने निर्णय गरेको छ । यसबाट आन्तरिक उत्पादन बढ्ने अर्थमन्त्री डा. प्रकाशशरण महतको भनाई छ । तर, आन्तरिक उत्पादनको सिजनको समयमा गोलभेँडा उत्पादकले लागतअनुसारको मूल्य पाइरहेका छैनन् ।

यतिबेला कालीमाटी फलफूल तथा तरकारी बजार विकास समितिमा गोलभेँडाको थोक मूल्य ८ रूपैयाँ छ । यसको अर्थ किसानले खेतमा बढीमा प्रतिकिलो १ रुपैयाँदेखि २ रुपैयाँसम्म मात्रै भाउ पाउने गरेका छन् । यसैको विरोधमा कालीमाटीमा सडकमा गोलभेँडा फालेर किसानले विरोध जनाएका हुन् ।