एमालेमा फर्कन दोस्रो वरीयता चाहिने वामदेव गौतमको सर्त

३ असार, काठमाडौं । नेकपा (एमाले)का पूर्व नेता एवं नेकपा एकता राष्ट्रिय अभियानका संयोजक वामदेव गौतम एमालेमा जाने तयारीमा लागेका छन् ।

यसनिम्ति उनले आइतबार एमालेका अध्यक्ष केपी शर्मा ओलीसँग भेटवार्ता गरेका छन् । ओलीसँग गौतमले आफू एमालेमा फर्कन तयार रहेको र त्यसमा दोस्रो वरीयता दिनुपर्ने सर्त अगाडि सारेका छन् । 

उनले ओलीसँग च्यासलस्थित एमाले मुख्यालयमा भेट गरेका हुन् । एमालेले सचिवालयको बैठकले हालै मात्र ७० वर्षको उमेर हद हटाएपछि गौतम एमालेमा फर्कन लागिपरेका हुन् । ७० वर्षको उमेर हद हटाउनुपर्ने माग उनले पहिल्यैदेखि गर्दै आएका थिए । एमालेको बुटवलमा भएको नवौं महाधिवेशनबाट उक्त उमेर हदको प्रावधान राखिएको थियो । 

एमालेबाट छुट्टिएर माधवकु्मार नेपालको नेतृत्वमा गठित नेकपा (एकीकृत समाजवादी)का पाका उमेरका नेताहरु एमालेमा फिर्ता भएका छन् । उनीहरुलाई उमेर हद हटाएपछि जिम्मेवारी दिइएको छ । एमालेमा अहिले अध्यक्ष ओलीपछि वरिष्ठ उपाध्यक्ष ईश्वर पोखरेल दोस्रो वरीयतामा छन् ।