संसदमा प्रश्नः ‘विद्युत प्राधिकरण उत्तरदायी जनताप्रति कि विदेशीप्रति ?’

४ असार, काठमाडौं । आम जनता पार्टी (आजपा)का अध्यक्ष एवं सांसद प्रभु साहले नेपाल विद्युत प्राधिकरणको कामकारवाही र कार्यशैलीमाथि प्रश्न उठाएका छन् । सोमबार प्रतिनिधिसभाको बैठक उर्जा मन्त्रालयमाथि आगामी आर्थिक वर्ष २०८०÷८१ का लागि विनियोजित बजेटमाथि छलफलमा भाग लिँदै सांसद साहले प्राधिकरण नेपाली जनताभन्दा विदेशी दलालहरुप्रति बढी उत्तरदायी बनेको आरोप लगाएका छन् । 

अर्थमन्त्रालयले ऊर्जा मन्त्राललय मातहतका निकाय प्राधिकरणका लागि एकमुष्ट रुपमा बजेट छुट्याएर नीतिगत भ्रष्टाचार गरेको बताए । प्राधिकरणका लागि शीर्षक र ठाउँ तोकेर बजेट विनियोज गरिनुपर्ने उनको धारणा छ ।

‘प्राधिकरणले कहाँ, कति, कसरी र कुन आधारमा प्रसारण लाइन, शव स्टेशन निर्माण भइरहेको छ भन्ने कुरा सांसदले हेर्न, अवलोकन गर्न पाइँदैन ? देशभित्र बिजुली उत्पादन के कसरी कहा भइरहेको छ भन्ने कुरा थाहा पाउन नहुने ?’ उनको प्रश्न छ, ‘सांसदले हेर्न, देख्न नहुने भनेकै नीगित भ्रष्टाचार हो । कमिशन खाएर उद्योगपति र दलालाई बिजुली दिने चर्को गर्मीमा रहेका जनतालाई फ्यान चल्ने बिजुली दिन मान्दैन, किन ?’ प्राधिकरणलाई छुट्याइएको बजेट रेडबुकमा आउनुपर्ने बताए ।

उनले सरकारले प्राकृतिक नदी, खोला विदेशी दलालहरुलाई कब्जा लिन दिने अनि राष्ट्रभक्तिको फोस्रो भक्तिगान गएको भन्दै उक्त काम रोक्न माग गरे । उनले वर्षातको बेला तराईमा सीमा क्षेत्रमा भारतले बाँध बाधेर तराईका बस्ती डुबाउने काम गरिरहेको भन्दै नेपालले आफ्नोतिरका भूभागमा बलियो बाँध बनाउनुपर्नेमा जोड दिए । हामीभन्दा तल रहेका भारतले बाँध बाँधेको विषयमा विरोध गरेर अर्थ छैन, हामी पनि बाँध बाँधेर बस्तीलाई सुरक्षित बनाउनुपर्छ’ उनले भने ।