प्रधानमन्त्री प्रचण्ड बाढी पहिरो प्रभावित क्षेत्र संखुवासभा गएपछि मोर्चा घोषणा अपरान्ह ४ बजे हुने

४ असार, काठमाडौं । समाजवादी मोर्चा घोषणको समय सारिएको छ। समाजवादी मोर्चाको घोषणा सोमबार अपरान्ह ४ बजे हुने भएको छ। त्यसका लागि राष्ट्रियसभा गृहमा घोषणा सभा आयोजना गरिएको छ।

प्रधानमन्त्री पुष्पकमल दाहाल प्रचण्ड आठजनाको ज्यान जाने गरी आएको पूर्वी पहाडी जिल्लाको बाढीपहिरो प्रभावित क्षेत्रको निरीक्षण निस्किएपछि मोर्चाको घोषणा अपराह्न ४ बजेका लागि सारिएको प्रधानमन्त्रीको सचिवालयले जनाएको छ । 

यसअघि दिउँसो ३ बजे नै मोर्चा घोषणा गर्ने कार्यक्रम तय गरिएको थियो। स्थान भने भृकुटीमण्डपस्थित राष्ट्रिय सभागृह नै तोकिएको छ। आज घोषणा हुने समाजवादी मोर्चामा नेकपा माओवादी केन्द्र, जनता समाजवादी पार्टी 'जसपा', नेकपा एकीकृत समाजवादी र विप्लव नेतृत्वको नेपाल कम्युनिस्ट पार्टी आबद्ध हुँदै छन्। 

उनीहरूले मोर्चा घोषणाको कार्यक्रमलाई ‘ऐतिहासिक घोषणा सभा’ भनेका छन्।  उक्त मोर्चामा डा। बाबुराम भट्टराईलाई पनि समेट्ने प्रयास भइरहेको बताइएको छ। सरकारमा देखिएको अस्थिरता रोक्न र सबैलाई एकीकृत गरेर अगाडि बढ्न सहज होस् भनेर मोर्चा गठन गर्न लागिएको नेताहरुले बताएका छन्।

चार दलका शीर्ष नेता छलफलमा जुट्नु अगाडि दोस्रो तहका नेताहरुबीच पनि बिहान छलफल भएको थियो। कार्यदलले मोर्चाको अवधारणापत्रको मस्यौदा तयार पारेको छ। यसलाई अन्तिम रूप दिन आज बैठक बोलाइएको थियो।

असार १ गते समाजवादी मोर्चा गठनको घोषणा गर्ने भनेपनि आन्तरिक तयारी नपुगेको भन्दै मोर्चा घोषणा हुन सकेको थिएन।  समाजवादी मोर्चा बने २७५ सदस्यीय प्रतिनिधि सभामा ५४ सिटसहित तेस्रो निर्णायक शक्ति निर्माण हुनेछ।