सत्तारुढ सांसद पाण्डेद्वारा बजेटको विरोध, एउटै शिक्षकले देशभरका विद्यार्थीलाई पढाउन सकिने व्यवस्था गर्न माग

४ असार, काठमाडौं । सत्तारुढ दल नेकपा (एकीकृत समाजवादी)का सांसद राजेन्द्र पाण्डले बजेटको चर्को विरोध गरेका छन् । सोमबार प्रतिनिधिसभाको बैठकमा ऊर्जा, संचार र परराष्ट्र मन्त्रालयमाथि आगामी आर्थिक वर्ष २०८०/८१ को वार्षिक बजेट विनियोजन विधेयकमाथि छलफल गर्दै विनियोजित बजेटप्रति चरम असन्तुष्टी व्यक्त गरेका छन् । 

उनले सरकारले बजेट बेवारिसे तरिकाबाट ल्याएको भन्दै आफू लगायत सांसदहरुले समर्थन नगर्ने सल्लाह भएको बताए । उनले धादिङमा आफूले भन्दै नभनेको क्षेत्र र शीर्षकमा कनिका आकारमा बजेट छरेर जनताको अपमान गरेको बताए । 

‘आफूले भनेको कुनैपनि क्षेत्रमा बजेट परेन, अन्यत्र कनिकासरह बजेट हालेका छन्, त्यो बजेट कसले भनेर हालिएको हो ? मन्त्रीज्यू जवाफ चाहियो’ उनले भने, ‘यही अवस्थामा बजेटको समर्थन म चाहिं गर्न सक्दिनँ ।’
उनले बुढीगण्डकी जलविद्युत आयोजनामा बजेट कटौती गरेको भन्दै आपत्ति जनाए छ । आयोजनाको बजेट कटौती नगर्न र आयोजनामा मुअब्जा दिने काम यसै आवमा टुंग्याउनुपर्ने बताए । 

साथै सांसद पाण्डेले अबको १० वर्षमा नेपालमै १० हजार मेगावाट बिजुली आवश्यक पर्ने बताउँदै त्यसका अतिरिक्त भारत र बंगलादेशमा पनि निर्यात गर्ने गरी बिजुली उत्पादनमा सरकार लाग्नुपर्ने बताए ।