विद्युत नीति भारत र चीन दुवैतिर बिक्री गर्ने हुनुपर्छ : रघुजी पन्त

४ असार, काठमाडौं । नेकपा (एमाले(का सांसद रघुजी पन्तले नेपालले भारत र चीन दुवैतर्फ बिजुली बिक्री गर्ने नीति लिनुपर्ने बताएका छन् ।

सोमबार प्रतिनिधिसभाको बैठकमा आगामी आर्थिक वर्ष २०८०/८१ का लागि संचार, परराष्ट्र र ऊर्जा मन्त्रालयमा विनियोजित बजेट शीर्षकमाथि छलफलमा भाग लिँदै सांसद पन्तले सरकारले भारतमा बिजुली बिक्री गर्ने जस्तो नीति लिएको भन्दै असन्तोष व्यक्त गरे । 

‘नेपालले आफ्नो देशमा उत्पादित बिजुली कुनैपनि देशलाई बिक्री गर्न स्वतन्त्र छ, तर भारत भ्रमणका क्रममा प्रधानमन्त्री प्रचण्डले वार्षिक रुपमा १० हजार मेगावाट बिजुली बिक्री गर्ने कुरा भयो भनेर प्रचार गरिएको छ,’ उनले भने, ‘तर अन्य छिमेकी मुलुक चीनसँगको सम्बन्ध र व्यापारलाई बिर्सने काम भए भोलिका दिनमा भारतले किन्दिनँ भन्यो भने हाम्रो हालत केह हुन्छ ?, त्यसकारण भारतले नेपालमा चीन नआओस् भन्ने चाहन्छ भने त्यो स्वीकार्य हुँदैन ।’

देशभित्र उपभोग पुगेपछि मात्र बिजुली निर्यात गरिनुपर्नेमा उनको जोड थियो । परराष्ट्र नीतिलाई सरकारले आफ्नो दलको स्वार्थमा प्रयोग नगर्न सचेत गराए ।