मौद्रिक नीतिका लागि शेयर लगानीकर्ताको सुझावः मार्जिन ट्रेडिङमा संशोधन गर्नुपर्ने

४ असार, काठमाडौं । शेयर लगानीकर्ताहरुको एक टोलीले आगामी मौद्रिक नीतिका लागि नेपाल राष्ट्र बैकका गर्भनर महाप्रसाद अधिकारीसँँग भेट गरी विभिन्न बुँदामा सुझाव दिएको छ । सांसद हरि ढकालसहित लगानीकर्ताहरुको टोलीले सोमबार गभर्नर अधिकारीलाई भेटी ८ बुँदे सुझाव पेस गरेको हो । 

टोलीले अन्तर्राष्ट्रिय अभ्यासअनुरुप नेपालको पूँजी बजारलाई दीर्घकालीन रुपमा चलायमान बनाउन शेयर दलालमार्फत नै लगानीकर्ताले शेयर किन्ने व्यवस्थाका लागि सुझाव दिएका छन् । व्यवस्थाका लागि नेप्सेको मार्जिन ट्रेडिङ कार्यविधि अन्तर्गत परिचालन हुने गरी राष्ट्र बैंकले तत्काल १० अर्बको कोष खडा गर्नुपर्ने सुझाव दिइएको छ । 

कर्जा मार्जिन ट्रेडिङमा रहेको व्यवस्था संशोधन गर्न सुझायव दिइएको छ । ‘शेयर दलालहरुलाई स्थायीरुपमा मार्जिन ट्रेडिङ सुविधा प्रदान गर्न आवश्यक पर्ने वित्तीय स्रोत उपलब्ध गराउनसक्ने खालको गैरबैंकिङ बित्तीय संस्था स्थापनाका लागि राष्ट्र बैंकले नीतिगत ब्यवस्था गरी तत्कालै कार्यान्वयनमा ल्याउनुपर्ने’ सुझावको बुँदा नं. २ मा भनिएको छ ।

साथै उनीहरुले आर्थिक विधेयकको बुँदा नं. २६ र २७ ले बैंकका लगानीकर्तामा अप्ठ्यारो पारेको भन्दै त्यसलाई हटाउन राष्ट्र बैंकले पहल गर्न ध्यानाकर्षण समेत गराएका छन् ।

राष्ट्र बैकले केही दिनपहिले मात्र निकट भविष्यमा गरिने मौद्रिक नीतिको समीक्षाका लागि सुझाव माग गरेको थियो । सरकारले ल्याएको आगामी आर्थिक वर्ष २०८०÷८१ को बजेटमाथि संसदमा छलफल भइरहेको छ । छलफल सकेर पारित भएर कार्यान्वयनमा लगेसँगै भएपछि राष्ट्र बैैंकले मौद्रिक नीति ल्याउने व्यवस्था छ ।