बजेट पुस्तिकामा प्रदेशको नाम सच्याउन सभामुख घिमिरेको निर्देशन

५ असुार, काठमाडौं । सरकारले आगामी आर्थिक वर्ष २०८०/८१ को बजेटअन्तर्गत विषयगत मन्त्रालयको बजेट पुस्तिकामा प्रदेशको नाम गायब भएको विषयमा सभामुख देवराज घिमिरेले निर्देशन दिएका छन् । 

संसदमा छलफलमा लागि सांसदहरुलाई वितरण गरिएको संस्कृति, पर्यटन तथा नागरिक उड्डययन मन्त्रालयको विनियोजित पुस्तकमा मधेश प्रदेश र कोशी प्रदेशको नामको ठाउँमा पुरानै नाम राखेको र शहरी विकास मन्त्रालयमाथि विनियोजित बजेट पुस्तकमा लुम्बिनी प्रदेशको नाम अर्कै उल्लेख भएको पाएपछि आजको संसदमा प्रतिपक्षी दलका सांसदहरुले छलफलमा नल्याउन अडान राख्दै विरोध गरेका थिए ।

विरोधपछि सम्बन्धित मन्त्रालयका मन्त्रीहरुले सच्याएर ल्याउने आश्वसन दिएपनि विरोध नहटेपछि सभामुख देवराज घिमिरेले विजिनयोजन विधेयकका मन्त्रालयगत कार्यक्रमम समावेश भएको पुस्तिकाहरुमा प्रदेशको नाम सच्याएर वितरण गर्न सरकार र सम्बन्धित मन्त्रालयलाई निर्देशन दिएका हुन् । 

निर्देशनपछि आजको बैठकमा शहरी विकास मन्त्रालयको विनियोजन विधेयकमाथि छलफल सुचारु भएको छ ।

यस्ताे छ निर्देशनः

माननीय सदस्यहरु,

हामी विनियोजन विधेयकअन्तर्गत विभिन्न मन्त्रालयगत छलफलमा छौं । सम्बन्धित मन्त्रालयहरुबाट वार्षिक रुपमा सम्पादन हुने कार्यक्रम समावेश पुस्तिकामा उल्लेखित केही विषयहरु, खास गरी प्रदेश सभाबाट पारित प्रदेशको नाम उल्लेख हुनुपर्नेमा सो नभएको विषयमा ध्यानाकर्षण सहित सच्याउनका लागि यसअघि निर्देशन भइसकेको छ । साथै, त्यस्ता कुनै त्रुटिहरु भएका भए तत्काल सच्याउन पुनः निर्देशन गर्दछु ।

त्यसैगरी सभाको आजको कार्यसूचीमा रहेको सहरी विकास मन्त्रालय अन्तर्गत वार्षिक रुपमा सम्पादन हुने कार्यक्रमको शीर्षकहरुमा प्रदेशको नाम हुनुपर्नेमा अंक उल्लेख भएको र यस विषयमा माननीय सदस्यहरुले प्रश्न उठाइसके पश्चात माननीय मन्त्रीले सदनलाई जानकारी गराउँदै सच्याउने समेत प्रतिबद्धता व्यक्त गरिसक्नुभएकाले अंकको सट्टा प्रदेशको नाम राखी आवश्यकता अनुसार सुधार गर्न म सम्बन्धित मन्त्रालयलाई निर्देशन गर्दछु ।