संसदमा विनियोजन विधेयकमाथि छलफल : ब्याजदर सिंगल डिजिटमा झार्नुपर्नेमा जोड

५ असार, काठमाडौं । सांसदहरुले बैंकिङ ब्याज दर सिंगल डिजिट (एक अंक)का झार्नुपर्नेमा जोड दिएका छन् । प्रतिनिधिसभाको जारी बैठमा अर्थसहित ४ मन्त्रालयको विनियोजन विधेयकमाथिको छलफलमा धारणा राख्ने क्रममा सांसद रञ्जुकुमारी झाले बैंकको ऋण ब्याज दर १४ बाट ९ प्रतिशतमा कायम गर्ने व्यवस्था गर्न सुझाव दिइन् ।

चर्को ब्याजका कारण ऋण तिर्न नसकेर व्यापारी (ऋणी)ले आत्मदाहको बाटो रोज्न विवश भइरहेको बताउँदै यसलाई रोक्न अर्थ मन्त्रालयले ठोस नीति ल्याउनु पर्ने बताइन् । मधेशमा बजेट कम छुट्याइएको भन्दै आपत्ति समेत जनाइन् ।

उनले आगामी आवको बजेट एक चौथाई बढी प्रधानमन्त्री, मन्त्री र पूर्वप्रधानमन्त्रीको जिल्लामा छुट्याएर सांसदहरुको घोर अपमान गरेको बताइन् । उनले खाद्यन्नमा कर घटाउनुपर्ने बताइन् । 

यस्तै, सांसद मेटमणि चौधरीले बैंक ब्याजदर नघटाएसम्म वित्तीय क्षेत्रमा सुधार ल्याउन नसक्ने बताए ।