प्राकृतिक वातावरणको हिसाबले योग र ध्यानका लागि नेपाल संसारमै उत्कृष्टः प्रधानमन्त्री

६ असार, काठमाडौ । प्रधानमन्त्री पुष्पकमल दाहाल प्रचण्डले सरकारले योग र ध्यानका लागि नेपाल विश्वमै उत्कृष्ट रहेको बताएका छन् । उनले यो विषयलाई प्राथमिक तहदेखि नै विद्यालय र विश्वविद्यालयसम्म पाठ्यक्रममा समावेश गरिने बताएका छन् । बुधबार काठमाडौंमा अन्तर्राष्ट्रिय योग दिवसका अवसरमा आयोजित कार्यक्रममा उनले यस्तो बताएका हुन् ।

प्रचण्डले योग र ध्यानको महत्व्, परम्परा र विरासतलाई आत्मसात् गरेर नै सरकारले यस्तो निर्णय लिएको बताए । उनले यो निर्णयले आध्यात्मिक चिन्तनको महत्वलाई स्थापित गर्न गुणात्मक र दीर्घकालीन भूमिका खेल्ने विश्वास व्यक्त गरे ।

प्रधानमन्त्री प्रचण्डले नेपालका पुराना सहर र भवनको निर्माणमा पनि योगको ज्ञान, विज्ञान एवं वास्तु इन्जिनियरिङको प्रयोग भएको पाइने उनले उल्लेख गरे । प्राकृतिक वातावरणको हिसाबले पनि नेपाल संसारभरका मानिसका निम्ति योगभ्यासका लागि एउटा सुन्दर भूमि रहेको उनले बताए ।

योगसम्बन्धी ज्ञान–विज्ञानको अध्ययन गरिरहेका विश्वभरका अध्येताका लागि नेपाल मूल गन्तव्य बन्न सक्ने प्रचुर सम्भावना रहेको उनको भनाइ छ । नेपालमा योग पर्यटनमा गुणात्मक विकास गर्न सकिने उनको धारणा छ ।  
 
प्रचण्डले योगमाया आयुर्वेद विश्वविद्यालयले भविष्यमा विश्वस्तरीय विश्वविद्यालयका रूपमा आफूलाई स्थापित गर्दै यस क्षेत्रमा प्राज्ञिक नेतृत्व गर्ने विश्वास व्यक्त गरे । उनले योग शारीरिक अभ्यास मात्र नभई निश्चित नियम, विधि र प्रक्रियामा रही अपनाउने वैज्ञानिक जीवनशैली र जीवनपद्धति भएको बताए ।