सत्ता गठबन्धनका तीन दल बजेट संशोधनको पक्षमा, यथास्थितिमा सरकारलाई साथ नदिने

७ असार, काठमाडौं । सत्ता गठबन्धनभित्र तीन दल सरकारले ल्याएको आगामी आर्थिक वर्षको बजेट संशोधन गर्नुपर्ने पक्षमा उभिएका छन् । नेकपा एकीकृत समाजवादी, जनता समाजवादी र जनमत पार्टीले यथास्थितिमा सरकारले बजेट पारित गराउन खोजे यसको विपक्षमा मतदान गर्ने अडान लिएका छन् ।   

पछिल्लो समयमा आएर सत्तारुढ गठबन्धनको घटक जनता समाजवादी पार्टीले पनि संसदमा प्रस्तुत बजेटले धेरै क्षेत्रलाई उपेक्षा गरेकाले त्यसलाई यथास्थितिमा पारित गर्न नसकिने बताएको छ । अध्यक्ष उपेन्द्र यादवले बिहीबार पत्रकार सम्मेलन गरी बजेटमा सुधारको जरुरी रहेको बताए । उनले अहिलेको बजेटमा एकलौटी ढंगले गठबन्धनमा रहेका दलसँग छलफल नै नगरी ल्याइएको उनको भनाइ छ । 

यादवले बजेटले मधेस लगायतलाई उपेक्षा गरेको र यसलाई सुधार नगरी यथास्थितिमा पास नहुने बताए । उनले सरकार बजेट संशोधन गर्न तयार हुनुपर्ने बताए । यसअघि सरकारको अर्को सत्ता घटक नेकपा समाजवादीले पनि यथास्थितिमा बजेट पारित गर्न नदिने बताएको थियो । नेकपा एसले बजेटकै विषयमा आज पनि छलफलका लागि संसदीय दलको बैठक बोलाएको छ ।  

यस्तै जनमत पार्टीले पनि बजेट जनमुखी नभएको बताएको छ । उनले बजेटमाथिको छलफल कर्मकाण्डी मात्र भएको भन्दै बजेट छलफलमा समेत असहमति जनाइरहेको छ । जनमतका अध्यक्ष सिके राउतले कर्मकाण्डी बजेट भएकाले संसदमा उपस्थित हुनुको पनि औचित्य नभएको भन्दै यसलाई संशोधन नगरी पारित गर्न नसकिने बताएका छन् ।