रास्वपा र मेरो सोच मिल्यो, म आएँ : अनिल शाह

५ असार, काठमाडौं । रास्वपाका प्रशिक्षण विभाग प्रमुख अनिल शाहले रास्वपा र आफ्नो सोच, विचार मिलेकै कारण आफू रास्वपामा आवद्ध भएको बताएका छन् ।

रास्वपाले बुधबार पार्टी  स्थापनाको पहिलो वर्ष पुगेको दिन बुधबार मात्र केन्द्रीय समिति र संसदीय दलको संयुक्त बैठकबाट सर्वसम्मतिले शाहलाई पार्टीको प्रशिक्षण विभागका प्रमुखमा चयन गरेको छ । 

चयनपछि पार्टी कार्यालयमा आयोजित पत्रकार सम्मेलनमा पार्टी सभापति रबि लामिछानेले शाहको आवागमनले पार्टीलाई थप उचाईमा पुर्याउन जनताकाबीच लैजान पार्टीका नेताहरुलाई थप हौलसा मिल्ने विश्वास व्यक्त गरे । 
सोही क्रममा नवनियुक्त प्रशिक्षण विभाग प्रमुख शाहले आफ्नो र रास्वपाको विचार, उद्देश्य र सोच मिलेकै कारण आफू रास्वपामा आवद्ध हुने मौका मिलेको बताए । आफूले पार्टीले दिने हरेक जिम्मेवारी पूरा गरेर देखाउन प्रतिवद्धता जनाए । 

‘पहिल्यैदेखि रास्वपाको सोच, व्यवहार र योजना नजिकबाट हेर्दै आइरहेको हो, पछिल्लो समयमा सँगै काम गर्ने मौका मिलेको पनि छ’ उनले भने, ‘अब मेरो प्रश्न र उत्तर बैंकभन्दा राजनीति अझ रास्वपासँग बढी सम्बन्धित हुन्छन्, तपाईँ पत्रकारहरु साथीहरुले पनि त्यही हिसाबाट प्रश्न गर्नुहुन्छ भन्ने विश्वास छ ।’

रास्वपा हरेक क्षेत्र, विज्ञता पक्ष र समूदायबाट प्रतिनिधित्व रहेको पार्टी भएको उनको भनाइ थियो ।