बैंकिङ प्रणालीमा रकम थुप्रियो, १० अर्ब तान्दै राष्ट्र बैंक

७ असार, काठमाडौं । नेपाल राष्ट्र बैंकले बैंकिङ प्रणालीमा रहेको लगानीयोग्य रकम बढी भएपछि १० अर्ब रकम तान्ने भएको छ । एक सूचना जारी गर्दै राष्ट्र बैंकले रिभर्स रिपोमार्फत १० अर्ब रुपैयाँ बैंकिङ प्रणालीबाट खिच्न लागेको जनाएको छ । राष्ट्र बैंकले असार १४ गतेसम्मका लागि ७ दिने अवधिको बोलकबोलमार्फत १० अर्ब खिच्न लागेको जनाएको छ ।

२०७९ माघ १२ गते ५ अर्ब रुपैयाँ तानेपछि पहिलो पटक बैंकिङ प्रणालीबाट पैसा खिच्न थालेको हो । बैंकिङ प्रणालीमा हाल ३ खर्बभन्दा बढी रकम थुप्रिएको छ । बैंकिङ प्रणालीमा पैसा थुप्रिएपछि अन्तरबैंकदर, ट्रेजरी बिलको दर पनि घट्दै गएको छ । 

२८ दिने ट्रेजरी बिलको दर एक साताअघि ६.६ प्रतिशत रहेकोमा हाल ४.२ प्रतिशतको सीमामा झरेको छ । बैंकहरुमा निक्षेप संकलन बढ्दै गएपनि कर्जा प्रवाह बढ्न नसक्दा नगद थुप्रिएको हो । बाणिज्य बैंकहरुमा रहेको रकम लगानी हुन नसकेकपछि राष्ट्र बैंकले तान्न लागेको हो ।