बजेटबारे जसपाको औपचारिक धारणाः ‘यथास्थितिमा पारित गर्न सकिँदैन’

७ असार, काठमाडौं । सत्तारुढ गठबन्धनको घटक जनता समाजवादी पार्टी (जसपा)ले संसद्‌मा सरकारले जेठ १५ मा संघीय संसदको संयुक्त बैठकमा आगामी आर्थिक वर्ष २०८०÷८१ का लागि सार्वजनिक गरेको बजेट जस्ताको तस्तै पारित गर्न साथ दिन नसक्ने औपचारिक रुपमा बताएको छ । 
बिहीबार जसपाका अध्यक्ष एवं पार्टीका संसदीय दलका नेता समेत रहेका उपेन्द्र यादवले पत्रकार सम्मेलन गरी बजेट सुधार नभएसम्म सर्थन गर्न नसकिने स्पष्ट पारेका छन् । उनले बजेट सरकारका मुख्य दलहरुले मिलेर एकलौटी रुपमा ल्याएको र विभेदकारी रहेको भन्दै आलोचना दोहोर्याए । यसअघि संसदमा बजेटमाथि धारणा राख्ने क्रममा उनले बजेट विभेदकारी, पक्षपाती र न्यायोचित नरहेको भन्दै विरोध जनाएका थिए । 
ुअहिलेको बजेटमा एकलौटी ढंगले गठबन्धनमा रहेका दलसँग छलफल नै नगरी ल्याइएको छ । मधेस लगायतलाई उपेक्षा गरेको छ । यसलाई सुधार गर्नुपर्छ, यथास्थितिमा बजेट पास हुन्न’ पत्रकार सम्मेलनमा अध्यक्ष यादवले भने । पार्टीका सांसदहरुले विरोध गरिरहेका अवस्थाबीच जसपाले आज पत्रकार सम्मेलन गरेरै यथास्थितिमा बजेटको समर्थन गर्न नसकिने बताएको हो । 
यस्तै सत्तारुढ अर्का दल एकीकृतका अधिकांश सांसदहरुले पनि बजेट विभेदकारी रहेको भन्दै विरोध गर्दै आइरहेका छन् । बजेटलाई जस्ताको तस्तै पारित गर्न समर्थन गर्न ननसकिने उनीहरुको भनाइ छ । एकीकृत समाजवादीका सांसद प्र्रेम आले, उपाध्यक्ष समेत रहेका सांसद राजेन्द्र पाण्डे लगायतले संसद बैठकमा रोष्ट्रमबाटै बजेट जस्ताको तस्तै पारित गर्न नसकिने बताएका थिए । यद्यपि एकीकृत समाजवादीका अध्यक्ष माधवकुमार नेपालले भने औपचारिक रुपमा मुख खोलेका छैनन् । उनी सुधार गरेर पारित गर्नुपर्ने पक्षमा रहेको बताइन्छ । 
जनमत पनि विपक्षमा
सरकारका अर्को घटक जनमत पार्टीले पनि बजेट संशोधन नभएसम्म समर्थन गर्ने पक्षमा उभिएको छ । जनमत पार्टीका अध्यक्ष एवं पार्टीका संसदीय दलका नेता समेत रहेका सांसद सिके राउतले बजेटलाई जस्ताको तस्तै पारित गर्न नसकिने स्पष्ट पारेका छन् । पार्टीका उपाध्यक्षसमेत रहेका पूर्वमन्त्री एवं सांसद अब्दुल खानले बजेट मधेशका जनताप्रति विभेदकारी रहेको र प्रधानमन्त्री, अर्थमन्त्री, यातायातमन्त्री र पूर्वप्रधानमन्त्रीको जिल्लामा खन्याएको भन्दै आपत्ति जनाउँदै आएका छन् । उनले बजेटमाथि धारणा राख्ने क्रममा रोष्ट्रबाटै बजेटको विरोध गरेका छन् । अध्यक्ष राउतले पनि बजेट सुधार गरे मात्र पारित गर्नेबारे सोच्न सकिने बताए । सत्तारुढ अर्का दल नागरिक उन्मुक्ति, लोपपा, राजमोका सांसदहरुले पनि बजेट सुधार गर्नुपर्ने बताएका छन् । 
सत्तारुढ मुख्य दल नेपाली कांग्रेस, सरकारको नेतृत्व गरिरहेको माओवादी केन्द्रका सांसदहरुले पनि बजेटमा सुधार गर्नू अनिवार्य रहेको बताउँदै आएका छन् । उनीहरुले आफूहरु सत्ता पक्षका सांसद भएकाले विरोध गर्न नमिले पनि सुधार हुनुपर्ने पक्षमा रहेको बताउँदै आएका छन् । 
प्रतिपक्षी एमाले, रास्वपा, राप्रपा र नेमकिपाले बजेट पुनर्लेखन हुनुपर्ने अडान राखेका छन् । संसदमा बजेटबारे सांसदहरुबीच दिनुहँ जुहारी नै चल्ने गरिएको छ ।