मेयर बालेनलाई स्पष्टीकरण सोध्ने कार्य रोक्न उच्च अदालतको आदेश

७ असार, काठमाडौं । उच्च अदालत पाटनले काठमाडौं महानगरपालिका मेयर बालेन शाहसँग तत्काल स्पष्टीकरण नलिन नेपाल नागरिक उड्डयन प्राधिकरणको नाममा आदेश दिएको छ । 

बिहीबार न्यायाधीश धीरबहादुर चन्दको इजलासले बालेन शाहसँग स्पष्टीकरण माग गर्ने प्राधिकरणको पत्र कार्यान्वयन नगर्न अल्पकालीन अन्तरिम आदेश दिएको हो । स्पष्टीकरण सोध्नुका लिखित कारण पेस गर्न र रिट निवेदनमाथि छलफल गर्ने दुवै पक्षलाई बोलाउने आदेश पनि दिएको छ । 

काठमाडौं महानगरपालिका–९ मा सिनामंगलमा नागरिक उड्डयन प्राधिकरणको निर्माणाधीन भवन नक्सापास नभएको भन्दै महानगरपालिकाको नगर प्रहरीले अनुगमनका क्रममा जेठ ३२ गते फेन्सिङ तार काटेको थियो । 
सोको विरोधमा प्राधिकरणले नागरिक उड्डयन प्राधिकरण ऐन २०५३ को दुहाई दिँदै ‘तपाईँलाई कारवाही किन नगर्ने’ भन्दै ७ दिनभित्र लिखित जवाफ दिन साह, ९ वडाका अध्यक्ष, नगर प्रहरी लगायतलाई असार १ मा पत्र कोटेको थियो । 

पत्र काटेपछि शाहलगायत भवन निर्माणको अनुगमन र अनुमति दिने क्षेत्राधिकार आफ्नो भएको भन्दै पत्र खारेजीको मागसहित उच्चमा रिट दायर गराएका थिए ।