पार्टीका अन्तरवस्तुमाथि बहस चलाउन प्रेसमैत्री रणनीति बनाउँदै कांग्रेस

७ असार, काठमाडौं । नेपाली कांग्रेसले पार्टीको मुलभूत अन्तरवस्तुलाई बहसमा ल्याउन प्रेसमैत्री नीति अवलम्बन गर्ने भएको छ । देशको मूल राजनीति र समसामयिक विषयलाई लिएर पार्टीमाथि जनस्तरबाट विभिन्न प्रश्नहरू उठिरहेका बेला कांग्रेसले प्रेसमैत्री रणनीति अवलम्बन गर्न लागेको हो ।  

पार्टी नेतृत्व समयको माग र उत्पन्न परिस्थिति अनुकुल चल्न नसकेको भन्दै कांग्रेस यति बेला आफैं आन्तरिक विवादमा छ । १४ औँ महाधिवेशन सम्पन्न भएको लामो समय बितिसक्दा पनि पार्टीका गतिविधिलाई चलायमान बनाउने विभागहरू अझै गठन भएका छैनन् । भातृ तथा शुभेच्छुक संस्थालाई पूर्णता दिन पनि कांग्रेस चुकिरहेको छ ।      

खास गरी आम निर्वाचनपछि कांग्रेसका गतिविधिमाथि प्रश्न उठिरहेका छन् । सभापति शेरबहादुर देउवाको नेतृत्व पार्टीलाई चलायमान बनाउन र कांग्रेसमाथि उठिरहेका प्रश्नको जवाफसमेत दिन असमर्थ भएको भन्दै पदाधिकारी तहमा रहेका नेताहरूले नै विरोध गरिरहेका बेला कांग्रेसले प्रेसमैत्री रणनीति तयार गर्ने जमर्को गरेको हाे । 

सभापति देउवाले हालैमात्र प्रचार विभागको जिम्मेवारी नेता मीनबहादुर विश्वकर्मालाई दिएका छन् । विश्वकर्मा विभागको नेतृत्वमा आएपछि समिति पनि गठन भएको छ । तर विभाग गठनमा वरियता, पदीय मर्यादाको ख्याल नगरिएको तथा आफ्ना ढोके चम्चेदेखि दलाल र हुल्ल्डबाजसम्मलाई एकै ठाउँमा राखेर विभागको गरिमा र महत्वलाई नजरअन्दाज गरिएको भन्दै समितिमा परेकाहरूबाटै विरोध र असहमति प्रकट पनि भएको छ । सूचना र प्रचारको 'प र स' सम्म नजानेकाहरुलाई केही नेताको कोटको खल्तीबाट निकालेर हुल जम्मा गरिएको प्रति चौतर्फी विरोध पनि भएको छ ।

यद्दपि नेता विश्वकर्माले पार्टीका विभिन्न गतिविधि बढाउन विभाग अन्तर्गत हुने कामलाई गति दिने तयारी गरेका छन् । तर, उनको विभाग भौतिक रुपमा असरल्ल छ । यसै पनि कांग्रेसको पार्टी कार्यालय अव्यवस्थित नै रहने गरेको छ । 

कार्यालय भएपछि जनसम्पर्क बढ्छ, कार्यकर्ता आउँछन । तर, उनी बस्ने कार्यालयसमेत व्यवस्थित छैन । अहिले पार्टी कार्यालयको छतको एक भागमा उनका लागि कार्यालयको व्यवस्थापन भइरहेको छ ।  केही दिनभित्र यसलाई व्यवस्थित गर्ने उनले बताए । बुधबार उनकै निमन्त्रणामा नेपालबहसको एक टोली कांग्रेस पार्टी कार्यालय सानेपा पुगेको थियो । छतको एक कुनामा आफ्नो कार्यालय बनाएर बसेको अवस्थामा भेटिए प्रचार विभाग प्रमुख  विश्वकर्मा । 

भलाकुसारीका क्रममा उनले आफ्नो प्रेसमैत्री रणनीति सुनाए । विश्वकर्माले अहिले पार्टी र सरकारका सबै गतिविधिबारे प्रेसको ठूलो भूमिका देखिएको तर, कांग्रेस र प्रेससँगको  सम्बन्ध त्यति राम्राे नदेखिएको बताए । उनले कांग्रेस प्रेस स्वतन्त्रताको पक्षधर भएपनि यतिमै चित्त बुझाउने स्थिति नभएको भन्दै अब सम्बन्ध विस्तार गरिने बताए । 

उनले प्रेसले सम्पर्क गर्दा कांग्रेस नेता नभेटिने र भेटिएपनि पूर्ण सूचना र जानकारी नदिने गरिएको प्रति आफू सचेत रहेकाे बताए । प्रेसले सहज सूचना खोज्दा हामीले दिन सक्नुपर्थ्यो । यसमा विगत देखि नै कमजोरी भएको उनले सुनाए । प्रेस निकट सम्बन्ध बनाउन र पार्टीका हरेक गतिविधि जनतासामू पुर्याउन कस्तो रणनीति अंगीकार गर्ने भन्ने विषय उनले निकटस्थहरुसँग छलफल भइरहेको बताए । 

विश्वकर्माले भने, ‘अहिले कांग्रेसका पक्षमा लेख्ने पत्रकारहरू कम देखिएका छन । यसको कारण पनि कांग्रेस नै हो । प्रेसलाई बुझेर आफ्ना विषयहरू पस्किने काम नभएकाले कांग्रेसको प्रेससँगको सम्बन्ध विस्तारै टाढिँदै गएको हो । अब यसमा आमुल परिवर्तन गरिनेछ । अब कांग्रेस र पत्रकारको सम्बन्ध प्रगाढ हुन्छ । चाहे त्यो कांग्रेस विरोधी किन नहोस ।’ 

उनले प्रेसलाई पूर्ण उपयोगका लागि आईटी सेक्टरलाई पनि बलियो बनाउने बताए । नयाँ प्रविधि अनुसार कांग्रेसका भनाइ र कार्यक्रमहरू बाहिर पुर्याउनका लागि प्रेसमैत्री नीति कांग्रेसले बनाउन खोजेको उनको आसय थियो । कांग्रेसबाट कांग्रेसको विरोध भइरहेको भन्दै उनले अबको ६ महिनासम्म कांग्रेस नेताहरूले मौन व्रत बस्नुपर्ने अवस्था देखिएको छ । पार्टी र नेतृत्वको बाहिरबाट भन्दा पनि कांग्रेस भित्रैबाट भइरहेको विरोध निकै हानिकारका भएको उनले बताए ।