सांसद केसीद्वारा कारागार पुनर्संरचना गर्न गृहमन्त्रीको ध्यानाकर्षण, बजेट न्यायोचित नरहेको भनाइ

८ असार, काठमाडौं । नेपाली कांग्रेसका सांसद अर्जुनर सिंह केसीले देशभरका कारागार (जेल)को पुर्नर्संरचना गर्न माग गरेका छन् । गृहमन्त्रालयमाथि आगामी आव २०८०/८१ का लागि विनियोजित बजेटमाथि धारणा राख्दै सांसद केसीले देशैभरका कारागारको अवस्था जीर्ण बनेको र क्षमता पनि निकै कमी रहेको बताए । 
कांग्रेस नेतृत्वको सरकारका बेला नीति बनाएर सबै जेलको पुनर्संरचना र क्षमता विस्तार गर्ने कार्यक्रम चलाएको स्मरण गर्दै त्यसलाई अहिलेका सरकारले आउँदो बजेट वर्षबाटै पुनर्संरचना गर्न गृहमन्त्री नारायणकाजी श्रेष्ठलाई सुझाव दिए । कैदीको संख्या बढेको र जेलको विद्यमान क्षमता साँधुरो भएको उनको भनाइ छ । युवा पंक्ति बढी मात्रामा लागू औषधमा फस्दै गएको र यसलाई रोक्न कार्यक्रम ल्याउन मन्त्रीको ध्यानाकर्षण गराए । जेललाई सुधार गर्न अनिवार्र्य रहेको बताए । उनले अहिलेको बजेट न्यायोचित नरहेको र बजेट सन्तुलित बनाएर थप गर्नुपर्ने बताए । 

यस्तै एमालेका सांसद रघुवीर महासेठले सरकारले जेललाई सुधार गृह नभई यातनाा गृह बनाइरहेको टिप्पणी गरे । ५ जना सुत्न सकिने क्षमताको ठाउँमा २५ जनासम्म केहदीलाई सुताइएको उनले बताए । ‘अपराधी प्रवृत्तिका मानिसलाई जेल राखिन्छ, त्यो कुरा बुझ्छौं, तर बाँच्न पाउने अधिकारको सम्मान गर्नु सरकारको दायित्व हो’ महासेठले भने । 

उनले गृह प्रशासनभित्र अपराध, भ्रष्टाचार र चलखेलको परिस्थिति देखिनु दुःखद् रहेको भन्दै यसलाई रोक्न गृहमन्त्रीको ध्यानाकर्षण गराए । उनले काठमाडौंमा पनि मिटरब्याजी मौलाउँदो अवस्थामा रहेको भन्दै धनुषामा भएका मिटरब्याजी र पीडितबारे सत्यतथ्य बाहिर ल्याउन माग गरे ।