उपप्राध्यापक प्रेम चलाउनेले तोडे आमरण अनशन

८ असार, काठमाडौं । त्रिभुवन विश्वविद्यालयका समाजशास्त्रका उपप्राध्यापक प्रेम चलाउने आफ्नो आमरण अनशन तोडेका छन् । उनलाई चितवनकी होमकुमारी बरालले दही खुवाएर अनशन तोडाएकी हुन् । 

आक्रमण परी गम्भीर घाइते अवस्थामा परेका बेला बरालले हेरचाह गरेर बचाएकी थिइन् । आफूमाथि आक्रमण गर्ने अभियुक्तहरुको मुद्दा फिर्ता लिने सरकारको निर्णयविरुद्ध यही सोमबारदेखि चलाउनेले त्रिभुवन विश्वविद्यालयको उपकुलपति कार्यालय अगाडि अनशन बस्दै आएका थिए । गएको जेठ २९ गते बसेको मन्त्रिपरिषद्को बैठकले अभियुक्तहरुको मुद्दा फिर्ता लिने निर्णय गरेपछि चलाउने आक्रोशित बनेका हुन् ।

अनशनकै बेला उनले सर्वोच्च अदालतमा दायर गराएको रिटमाथि सुनुवाई गर्दै बिहीबार मात्रै मुद्दा फिर्ता नलिन आदेश दिइसकेको छ । योसँगै उनले अडशन तोडेका हुन् । २०७७ असोज २० मा त्रिवि हाताभित्र कांग्रेस निकट नेविसंघका विद्यार्थी नेता हरि आचार्यसहित ४ जनाको समूहले रडले आक्रमण गरी अर्धचेत अवस्थामा छाडेका थिए । उद्धार गरी उपचारपछि उनी हाल बैशाखीको सहारामा हिँडडुल गर्दै आएका छन् ।